Андрэй Дундукоў, якога затрымалі 21 сакавіка, застанецца пад вартай у СІЗА-1 яшчэ на чатыры месяцы. Уладзімір Фёдараў, якога затрымалі 29 сакавіка, і знаходзіцца ў СІЗА КДБ, – на два месяцы. Такую інфармацыю распаўсюдзіў праваабарончы цэнтр «Вясна».
Сяргея Стрыбульскага, затрыманага 21 сакавіка, падоўжылі тэрмін на два месяцы. Цяпер ён у СІЗА-1.
Алесю Яўдаху падоўжылі тэрмін утрымання да 21 ліпеня. Пра гэта ён напісаў у сваім лісце.
Толькі аднаму з 16-ці фігурантаў справы «аб падрыхтоўцы масавых беспарадкаў», Сяргею Кунцэвічу, не інкрымінуюць дадатковага абвінавачання«Стварэнне незаконнага ўзброенага фармавання».
19 траўня фігуранта «справы патрыётаў» Яўгена Палтаржыцкага перавялі пад хатні арышт. Першапачаткова следства абвінавачвала яго ў рыхтаванні масавых закалотаў, пазней дадалі артыкул аб стварэнні незаконнага ўзброенага фармавання. Хлопец з’явіўся ў відэасюжэце пра арганізацыю «Белы легіён». У матэрыяле гаворыцца, што хлопец паказаў праваахоўнікам «схрон» з боепрыпасамі. Сам Палтаржыцкі ў сюжэце пра боепрыпасы нічога не сказаў.
Агулам па справе «Белага легіёну» затрымалі 26 асобаў. За кратамі застаюцца 16 чалавек.
Спіс затрыманых увесь час абнаўляе праваабарончы цэнтр Вясна.
ДР belsat.eu