Канцэрт Вольскага і фіналістаў «Заспявай 3.0». ОНЛАЙН забароненага выступу

video

Фінальны канцэрт музычнага конкурсу «Заспявай 3.0» з удзелам Лявона Вольскага адбыўся ў іншым месцы, чымся першапачаткова меркавалася. У кавярні «Chill Out» знянацку абвесцілі «санітарны дзень».

Канцэрт планавалася правесці ва ўнутраным дворыку кавярні «Chill Out» у Менску. Але перад самым канцэртам кавярня зачынілася на «санітарны дзень». Арганізатары перанеслі канцэрт на іншую пляцоўку.

Кавярня перад выступам Лявона Вольскага зачынілася на «санітарны дзень»

Свае творы жыўцом праспявалі фіналісты трох намінацыяў – беларуская паэзія, кавер і замежны пераклад.

Для тых, хто не меў магчымасці наведаць гэты канцэрт, Belsat.eu падрыхтаваў жывую трансляцыю.

Фотарэпартаж з канцэрту фіналістаў «Заспявай 3.0» і Лявона Вольскага.

У гэты вечар на сцэну выйшаў Лявон Вольскі. Выступіў таксама гурт «Leibonik», які прэтэндуе на перамогу ў намінацыі «Беларускі кавер». Уладальнікі тытулу «Адкрыццё года» ў беларускай музыцы (2014) пераспявалі акурат песню Лявона Вольскага з часоў гурту «Мроя» – «Я рок-музыкант».

«Мы абралі для выканання твор, на якім выраслі самі і які шмат у чым для нас зʼяўляецца ўзорам класічнага беларускага року. Спадзяемся, Лявон Артуравіч не пакрыўдзіцца на нашу вольную інтэрпрэтацыю», – сказаў лідар гурта «Leibonik» Сяргей Башлыкевіч, які адмыслова да гэтай версіі дапісаў свой куплет.

У канцэрце ўзяў удзел фаварыт у намінацыі «Спяваная паэзія» Фёдар Жывалеўскі, які паклаў на музыку верш Змітра Вішнёва «Танец-фрык».

Трэцім фіналістам, які выступіў у гэты вечар быў Віктар Лупасін – выканаўца ў арыгінальным жанры, які ён сам вызначае як «дэтанальны чылаўт». Ён трапіў у фінал у намінацыі «Замежны пераклад» з беларускім пераасэнсаваннем «Bohemian Rhapsody» гурту Queen.

На выступ Лявона Вольскага на канцэрце «Заспявай 3.0» менскія ідэолагі выдалі гастрольнае пасведчанне.

Легальных канцэртаў у Менску Лявон Вольскі не даваў больш за два гады – музыка апошнім часам выступае або на закрытых вечарынах, або на спантанных акцыях – варта згадаць ягоны канцэрт у падземным пераходзе або ў полі ў мікрараёне Сухарава.

Летняя серыя канцэртаў распачалася з выступу Дзмітрыя Нікановіча, Мікіты Надзёнава і Вольгі Сацюк. Трыа стваралася адмыслова для конкурсу, яны заспявалі вірусную кампазіцыю Эраса Рамаццоцці па-беларуску. Ладзяць конкурс «Tuzin.fm» і фонд «Вяртанне». Прызавы фонд складае € 1500.

ЮВ, belsat.eu, паводле tuzin.fm

Глядзі таксама
Каментары