Дэ Ніра: «Трамп – поўны вар’ят»


На думку актора, тое, што некаторыя любяць кандыдата ад рэспубліканцаў – «шаленства».

Амерыканскі актор і прадзюсар Робэрт Дэ Ніра заявіў у суботу, што кандыдат у прэзідэнты ЗША ад Рэспубліканскай партыі Дональд Трамп не павінен балатавацца на пасаду прэзідэнта, таму што ён «поўны варʼят».

Actor Robert De Niro talks to reporters and film professionals during "Coffee with..." event during the 22nd Sarajevo Film Festival in Sarajevo

Прадстаўляючы на Сараеўскім кінафестывалі лічбавую версію фільма «Таксіст» Марціна Скарсэзэ, дзе Дэ Ніра выканаў галоўную ролю, актор адказаў на пытанні баснійскіх журналістаў – у тым ліку пра Трампа.

«Гэта шаленства, што людзі любяць Дональда Трампа – ён не павінен быць нават там, дзе ёсць цяпер. Божа, дапамажы нам», – сказаў Дэ Ніра.

«Тое, што ён кажа – трызненне і лухта. Ён поўны вар’ят», – лічыць актор.

«Мяркую, цяпер медыі даюць задні ход. Нарэшце яны пачынаюць казаць: стоп, Дональд, хопіць – гэта вар’яцтва, гэта лухта, гэта нездарова», – цытуе Дэ Ніра Reuters.

Трамп вядомы сваймі контраверсійнымі заявамі пра мексіканцаў, кітайцаў і амерыканскіх ветэранаў вайны.

Выбары прэзідэнта ЗША пройдуць 8 лістапада. За месца ў Белым доме будуць змагацца былая дзяржсакратарка Гілары Клінтан і мільярдэр Дональд Трамп. Гэта будуць першыя ў гісторыі ЗША выбары, на якіх за прэзідэнцкае крэсла барацьбу будзе весці жанчына як кандыдат адной з двух галоўных палітычных сілаў краіны.

ДД, belsat.eu

Глядзі таксама
Каментары