Гук матораў, што роў на выходныя ў Менску, ужо аціх, але рэха параду байкераў гучыць дагэтуль. А ўсё таму, што цэнтральным удзельнікам падзеі быў Лукашэнка і ягоныя старэйшы ды малодшы сыны.
«Гэта ні з чым непараўнальна! Гэта здорава, што ён ачоліў калонну. Я бачыла, так гэта здорава! Проста гонар за тое, што ў нас такі спартовы прэзідэнт!»,
«Гэта ўвогуле не годна прэзідэнта, гэта не тое мерапрыемства, дзе мусіць прысутнічаць прэзідэнт»,
«Гэта вельмі добра, што прэзідэнт так рэагуе і бярэ ўдзел у грамадскім жыцці нашай краіны, таму гэта вельмі прыемна»,
– выказваліся менчукі.
Але ці сапраўды прыемна, калі задумацца пра кошт удзелу прэзідэнта ў імпрэзе?
«Нашае эканамічнае становішча вельмі дрэннае, і ёсць куды ўкласці грошы з нашых падаткаў»,
«Грошы, укладзеныя ў мерапрыемства маглі б пайсці на іншыя патрэбы гораду»,
– мяркуюць мінакі.
Афіцыйнай справаздачы пра выдаткі чакаць не даводзіцца. Але хаця б прыкладны кошт «прэзідэнцкіх пакатушак» паспрабавала вылічыць журналістка Святлана Калінкіна.
Паводле яе падлікаў, за пяць гадзінаў працы паўтары тысячы праваахоўнікаў дзяржаўны бюджэт выдаткаваў больш за $ 26 тыс.
«Калі бюджэт краіны ўжо не можа вытрымліваць гэтых тысяч ахоўнікаў міліцыянтаў, то іх і не павінна быць. То павінна быць 5-10. Тым больш, калі ты народам абраны прэзідэнт, то каго ты баішся?», – зазначыла Святлана Калінкіна.
І гэта без уліку аплаты аніматараў, медыкаў, пажарнікаў і камунальнікаў. Пры гэтым усе сродкі ідуць з дзяржаўнага бюджэту. Калі ж імпрэзу ладзіць апазіцыя, то ўлады фінансавы цяжар перакладаюць на арганізатараў.
«Сумы былі розныя. Аплата міліцыі магла каштаваць Br 2000. Усё залежыць ад працягласці мерапрыемства і маршрута», – распавёў Юрась Губарэвіч, намеснік старшыні Руху «За Свабоду».
Апазіцыя плоціць з уласных кішэняў, улады – з падаткаў насельніцтва. Пры гэтым заробкі беларусаў змяншаюцца, а выдаткі і прыбыткі Лукашэнкі – не.
«Заробак павінен нейкім чынам суадносіцца з вынікамі ягонай працы. Калі заробак простых людзей скараціўся ў разы, то заробак прэзідэнта таксама павінен скарачацца ў разы», – упэўненая Святлана Калінкіна.
Пакуль жа, як звярнуў увагу блогер Віктар Малішэўскі, скарачаюцца выдаткі на культурніцкія імпрэзы.
$ 585 – такую суму Міністэрства культуры гатовае выдаткаваць на культурніцкую імпрэзу для дзяцей.
Відаць, таму, што ў іх не бяруць удзелу кіраўнік краіны і ягоныя сыны.
Вольга Старасціна, «Белсат», фота – eugzolotuhin.livejournal.com