Чый Крым? На глобусе польскай фірмы Крым пазначаны як расейскі ды ўкраінскі


Глобус той жа фірмы на расейскай мове паказвае Крым як частку Расеі. Такія глобусы прадаюцца ў беларускіх крамах.

На глобусе польскай фірмы Glowala, які прызначаны для польскага рынку, Крым пазначаны як тэрыторыя Украіны. Што цікава, паўвостраў на глобусе гэтай жа фірмы для расейскага рынку – тэрыторыя РФ.

Беларусь не займаецца вытворчасцю глобусаў, таму да нас трапляюць глобусы з расейскім Крымам. На некаторых з іх Беларусь называецца «Белоруссией», Малдова – «Молдавией», а Крым, Паўднёвая Асеція і Абхазія пазначаныя як расейскія тэрыторыі. Гэта супярэчыць афіцыйнай беларускай пазіцыі, якая не прызнала акупацыю Крыму, Паўднёвай Асеціі і Абхазіі. Між іншым, гэтыя глобусы трапляюць у беларускія адукацыйныя ўстановы.

«Глобусы з расейскім Крымам мелі трапіць у Расею і Украіну»

«Белсат» звярнуўся па афіцыйны каментар да прадуцэнта глобусаў. У размове з нашым журналістам, прадстаўнікі фірмы адзначылі, што глобусы з расейскім Крымам не павінны былі трапіць у Беларусь.

«Мы не ведаем, як яны трапілі ў Беларусь. Гэтыя глобусы замовіў кліент з Расеі, ці нават Украіны. Ён патлумачыў нам, што Дзярждума Расеі прызнала Крым сваёй тэрыторыяй, выслаў адпаведныя дакументы. Расейскія вытворцы абавязаныя рабіць глобусы, мапы і атласы ў адпаведнасці з заканадаўствам РФ, з украінскім Крымам мы б іх не прадалі. Хіба гэтыя глобусы патрапілі ў Беларусь ад аптовага пастаўшчыка», – распавялі ў Glowala.

На глобусе на польскай мове Крым украінскі

У фірме адзначылі, што прадукуюць глобусы і на беларускі рынак, але яны на расейскай мове, бо па беларуску ў іх глобусы яшчэ не замаўлялі.

АС belsat.eu

Глядзі таксама
Каментары