Агароджа мае запабегчы міграцыі дзікоў і, у выніку, – распаўсюду афрыканскай чумы свінняў.
Пра пабудову плоту заявіў польскі міністр сельскай гаспадаркі Кшыштаф Юргель. Ён адзначыў, што кошт будаўніцтва складзе 130 млн злотых (больш за $ 36 млн). Міністэрства фінансаў ужо выдзеліла гэтыя сродкі.
Ініцыятыва міністра – вынік шматразовых просьбаў з боку польскіх фермераў, якія заклікалі ўрад весці больш эфектыўную барацьбу з вірусам афрыканскай чумы свіней, якая сёлета зноў атакавала ўсходнія землі Польшчы. Найбольш выпадкаў было выяўлена ў летнія месяцы. Увосень колькасць выпадкаў заражэння павінная зменшыцца, але паводле міністра, агароджа ўсё роўна патрэбная, падае «Польскае радыё».
Агулам з 2014-га, калі вірус быў зарэгістраваны ўпершыню, у прыватных польскіх гаспадарках выявілі 92 выпадкі заражэння.
729 кіламетраў
На думку экспертаў, польскія свінні былі інфікаваныя АЧС дзікамі, якія прыйшлі з Беларусі.
Польскія чыноўнікі мяркуюць, што ёсць два эфектыўныя сродкі, каб спыніць эпідэмію: адстрэльваць дзікоў і ўзвесці на ўсходняй мяжы плот, каб яны наагул не траплялі ў краіну.
Справаздачы па экалагічных і юрыдычных умовах пра магчымасць пабудовы плоту будуць падрыхтаваныя цягам бліжэйшых двух-трох тыдняў.
Працягласць агароджы складзе 729 кіламетраў.
ДД
