«Чаму Беларусь паводзіць сябе як васал Расеі?» – Максакава пра спецаперацыю ФСБ пад Гомлем
За дзень да забойства экс-дэпутата Дзярждумы Дзяніса Вараненкова ягонага кіроўцу на тэрыторыі Беларусі выкрала ФСБ. Раней пра гэта ўкраінскаму тэлеканалу ZIK паведаміла ўдава Вараненкова, былы дэпутат Дзярждумы Марыя Максакава. Сёння ў інтэрв’ю «Белсату» яна распавяла акалічнасці выкрадання, а таксама заклікала Аляксандра Лукашэнку «зацікавіцца расследаваннем справы».
Паводле словаў Максакавай, кіроўца Уладзіслаў Ціханькін 22 сакавіка ехаў з Масквы ў Кіеў да Вараненкова праз тэрыторыю Беларусі. У Гомельскай вобласці, у 11 кіламетрах ад Добрушу, яго спынілі беларускія праваахоўнікі.
«Уладзіслаў амаль даехаў да Гомля, калі яго спынілі на блокпасту (хутчэй за ўсё, гаворка пра пост ДАІ, – К.А) і па невядомай прычыне затрымалі. Мы пачалі тэлефанаваць. Тады беларускія міліцыянты сказалі, што аніякіх прэтэнзій да яго не маюць і не збіраюцца складаць пратакол. Затрыманне свядома не фіксавалася дакументальна, казалі, нібыта Ціханькіным цікавіцца памежная служба. Прыехала ж за ім абсалютна іншая служба», – кажа Марыя Максакава.
Ціханькіна пратрымалі на трасе каля дзвюх гадзін, не складаючы пратаколу і, разам з тым, не дазваляючы яму працягнуць шлях.
«Праз гадзіны дзве пад’ехалі некалькіх машын і мікрааўтобус «Газель» з супрацоўнікамі ФСБ, Уладзіслава вельмі жорстка затрымалі, прыкавалі кайданкамі да стырна і пад канвоем прымусілі вяртацца ў Бранскую вобласць. Я не ведаю, што гэта за схема ўзаемадзеяння і чаму Беларусь паводзіць сябе, як нейкі васал, аказвае дапамогу Расеі не ў самых прыгожых справах», – гаворыць удава палітыка.
Уладзіслаў Ціханькін не праходзіў па крымінальнай справе аб махлярстве, якую ў сярэдзіне лютага Следчы камітэт РФ распачаў у дачыненні да Вараненкова.
«Калі б ён і быў задзейнічаны, то чаму яго не затрымалі і не дапыталі на тэрыторыі Расеі? Думаю, ФСБ чакала, што Улад вёз сродкі абароны для Дзяніса і хацела гэта перадухіліць», – выказвае меркаванне Максакава.
Яна сцвярджае, што кіроўца правёў 12 гадзін у аддзяленні ФСБ у Бранскай вобласці, адкуль яго вызваляў адвакат.
Аднак асабліва ў сітуацыі з фактычным выкраданнем кіроўцы Марыю абурае роля беларускага боку.
«Беларусь, хоць і з’яўляецца незалежнай дзяржавай, аказвае невядома якія паслугі Расеі, – кажа яна, – Гэтая аперацыя была спланаваная ў дэталях. Я звяртаюся да прэсы таму, што ўпэўненая: калі б Аляксандр Лукашэнка ініцыяваў расследаванне справы, то лёгка б высветліў усе падрабязнасці. Гэта была б вялікая і важная дапамога з ягонага боку. У сваю чаргу, я прадстаўлю следству ўсе дадзеныя. Гэты эпізод адбыўся за нейкія 15 гадзін да забойства і мусіць быць расследаваны належным чынам, каб праліць святло на трагічныя падзеі 23 сакавіка».
Былы дэпутат Дзярждумы ад Камуністычнай партыі РФ Дзяніс Вараненкоў быў аб’яўлены з федэральны вышук па падазрэнні ў махлярстве, паведаміў Следчы камітэт сёлета ў лютым. Раней Вараненкоў з жонкай Марыяй Максакавай з’ехалі ў Кіеў і атрымалі ўкраінскае грамадзянства.
Пасля атрымання грамадзянства Вараненкоў даў паказанні Генпракуратуры Украіны супраць былога прэзідэнта Віктара Януковіча. Экс-дэпутат назваў памылкай анексію Крыму і параўнаў сучасную Расею з нацысцкай Нямеччынай.
23 сакавіка Вараненкова ў цэнтры Кіева застрэліў невядомы.
Кацярына Андрэева, belsat.eu; фота – REUTERS
