Буслы, сонца і Пагоня пад сэрцам – у Менску прайшоў Беларускі тату-фэст

video

Мода на нацыянальныя сімвалы цяпер і ў татуіроўцы. Усё больш беларусаў хочуць упрыгожыць сваё цела роднымі вобразамі.

Палачанін Віталь зрабіў татуіроўку з Пагоняй пяць гадоў таму, а пасля да яе дадаліся і элементы нацыянальнага арнаменту.

ВІТАЛЬ, ЖЫХАР ПОЛАЦКУ:

«Яе абараняюць два зубры, Пагоня – гэта сімвал нашай беларускай культуры, нашай мовы, нашай нацыі. Нас мала, як зуброў, але мы абаронім сваю Беларусь».

Глядзіце фотарэпартаж: Удзельнікі тату-фэсту ў Менску абіраюць нацыянальную сімволіку

Усіх аматараў тату-культуры штогод збірае ў Менску Беларускі тату-фэст, і калі раней сюды прыязджалі толькі айчынныя майстры, то сёлета ўдзел узялі і госці з краінаў-суседак. На думку арганізатара фэсту Алеся Таболіча, самыя беларусы пакуль не ўспрымаюць татуіроўку як асобны від мастацтва.

АЛЕСЬ ТАБОЛІЧ, АРГАНІЗАТАР ФЕСТЫВАЛЮ «BELARUS TATTOO FEST»:

«На дзяржаўным узроўні яна не ўспрымаецца як прафесія, але з гадамі да яе пачынаюць ставіцца як да жывапісу, як да графікі, яна паціху-патроху каранямі ўплывае на беларускую ментальнасць».

Беларусь тату-фэст – гэта не толькі магчымасць зрабіць выяву на целе, але і вялікі конкурс для майстроў, у праграме якога асобным пунктам – «Традыцыйная беларуская татуіроўка».

ЮЛІЯ КУЛЬБА, ТАТУ-МАЙСТАР, СЯБРА ЖУРЫ:

«Чаму ў Беларусі не было б нацыянальнага татуявання, навошта нам Японія, калі ёсць свае сімвалы, якія цудоўна глядзяцца на целе».

Беларускі тату-фэст, які сёлета займеў прыстаўку «міжнародны», праходзіць чацвёрты раз, і арганізатары спадзяюцца, што дзякуючы гэтай імпрэзе беларуская татуіроўка выйдзе на новы, больш прафесійны ўзровень.

НХ, belsat.eu

Глядзі таксама
Каментары