Агенцтва «Бюро Святаў» зладзіла ў краме вайсковую інсталяцыю.
Даволі спрэчную акцыю ў Дзень абаронцы айчыны правяло Першае святочнае агенцтва «Бюро Святаў».
У супермаркеце «Алмі» была арганізаваная адмысловая фота-зона з савецкім вайсковым матацыклам. На матацыкле – кулямёт і георгіеўская стужка.
«Вы ведаеце, мы не спецыяльна прывязалі да матацыкла гэтую стужку. Матацыкл мы ўзялі ў арэнду, а стужка ўжо на ім была. Нават неяк не прыдалі гэтаму значэння», – растлумачылі прадстаўнікі «Бюро святаў».
Акрамя матацыкла праходзіў конкурс па хуткаснай зборцы-разборцы АК-47 (аўтамат Калашнікава), які праводзілі двое байцоў 115-га зенітнага ракетнага палка. Прычым адзін з іх быў апрануты ў форму сучаснай беларускай арміі, а другі – у форму савецкага войска.
Наведнікам супермаркету вайсковая тэхніка прыйшлася да спадобы. Яны актыўна разбіралі аўтамат і фатаграфаваліся, некаторыя з дзецьмі, на фоне матацыкла з кулямётам.
АЛ, belsat.eu