Пілоты Андрэй Барысевіч і Аляксандр Цэнтэр завяршылі кругасветную вандроўку на самалёце «Cessna 182T Skylane», праляцеўшы 29 тысячаў кіламетраў.
Зямны шар яны абляцелі па паўночным кольцы, правёўшы ў шляху ледзь менш за месяц, у тым ліку 145 гадзінаў у паветры, і пераадолеўшы 29 тысяч кіламетраў.
У падарожжы пілоты наведалі 40 гарадоў у дзесяці краінах, перасеклі Атлантычны акіян. Мужчыны прызнаюцца, што ім пашанцавала: падчас усяго падарожжа трымалася добрае надвор’е, а асаблівых цяжкасцяў у паветры не было.
У размове з «БТ» Аляксандр Цэнтэр, які выконваў ролю камандзіра паветранага судна, сказаў, што адным з найскладанейшых момантаў было ляцець, калі ў пілота кругасветкі Барысевіча была тэмпература +38.
«Ляцеў, не сачкаваў, не прапускаў», – кажа Цэнтэр.
Самая складаныя месцы – Атлантыка, Аляску і Чукотку – беларусы праляцелі без здарэнняў.
«Трыццаць дзён нейкі бясконцы драйв. Гэта два велізарных тэлевізара злева і справа: у мяне левае акно, у Андрэя – правае акно. Самая прыгожая, вядома, нашая краіна. Без усялякага перабольшання, яна сапраўды прыгожая », – дадаў Цэнтэр у размове з СТВ.
Найвялікшым сюрпрызам для вандроўнікаў было тое, як хутка ляціць час у падарожжы.
«Цэлы месяц праляцеў як тыдзень», – сказаў Барысевіч.
Пілоты ўжо задумаліся пра новую вандроўку – над экватарам або Паўднёвым полюсам.
Аляксандр Цэнтэр – вядомы беларускі бізнесовец, кіраўнік групы кампаніяў «А-100», старшыня Беларускай федэрацыі авіяцыйнага спорту. «А-100» рэканструяваў аэрапорт у Ліпках, які зараз мае ўсе магчымасці для абслугоўвання лёгкай авіяцыі
«Беларускія навіны» падаюць, што самалёт, на якім было здзейснена кругасветнае падарожжа, належыць яму.
Пілоты вялі дзённік кругасветкі на адмысловай інтэрнэт-старонцы.
ДД