Беларускія праваабаронцы прызналі блогера Эдуарда Пальчыса палітзняволеным

video

Беларускія праваабаронцы прызналі блогера Эдуарда Пальчыса палітвязнем, гаворыцца ў сумеснай заяве закрытага беларускімі ўладамі праваабарончага цэнтру «Вясна», Цэнтру прававой трансфармацыі «Lawtrend», Беларускага дому правоў чалавека імя Барыса Звозскава (Вільня), Беларускага дакументацыйнага цэнтру, камітэту абароны рэпрэсаваных «Салідарнасць» і Грамадскага абʼяднання «Беларуская асацыяцыя журналістаў».

Яны патрабуюць вызваліць Пальчыса з-пад варты, бо забеспячэнне ягонай яўкі ў суд можа быць гарантаванае і іншымі захадамі стрымання, не звязанымі з ізаляцыяй абвінавачанага, а таксама спыніць справу ў дачыненні да блогера паводле ч. 1 арт. 130 Крымінальнага кодэксу (распальванне расавай, нацыянальнай ці рэлігійнай варожасці або розні) і забяспечыць правядзенне адкрытага судовага працэсу з захаваннем усіх гарантыяў справядлівага судовага разбору.

У заяве адзначаецца, што рэдактар сайту 1863х.com Эдуард Пальчыс абвінавачваецца ва ўчыненні злачынстваў, прадугледжаных ч. 1 арт. 130 (распальванне расавай, нацыянальнай або рэлігійнай варожасці або розні) і ч. 2 арт. 343 (распаўсюджванне парнаграфічных матэрыялаў) Крымінальнага кодэксу Рэспублікі Беларусь.

https://www.youtube.com/watch?v=7bYMm6m95s4

Пасля затрымання ў лістападзе 2015 года супрацоўнікамі КДБ у межах распачатай справы і вызвалення пад падпіску аб нявыездзе ён пераехаў ва Украіну. У студзені 2016 года Пальчыса затрымалі ў Расеі і ў канцы траўня 2016 года экстрадавалі ў Беларусь, дзе ён быў узяты пад варту.

25 жніўня 2016 года суд Цэнтральнага раёну Менску разгледзеў справу аб прызнанні экстрэмісцкай інфармацыйнай прадукцыі, размешчанай на сайце 1863х.com. У выніку закрытага судовага пасяджэння 9 артыкулаў, размешчаных на дадзеным сайце, былі прызнаныя экстрэмісцкімі.

Праваабаронцы настойвалі на неабходнасці правядзення незалежнага аналізу тэкстаў Пальчыса і не выключалі палітычнага матыву яго крымінальнага пераследу.

Прадстаўнікамі праваабарончых арганізацыяў з прыцягненнем спецыялістаў у розных галінах навукі быў праведзены аналіз дзевяці тэкстаў, размешчаных на сайце 1863х.com, якія ў судовым парадку былі прызнаныя экстрэмісцкімі і ў якіх, паводле следства, змяшчаецца інфармацыя, якая распальвае расавую, нацыянальную ці рэлігійную варожасць.

«Па выніках гэтага аналізу мы адзначаем наступнае. У адпаведнасці з артыкулам 19 Міжнароднага пакту аб грамадзянскіх і палітычных правах, кожны чалавек мае права бесперашкодна прытрымлівацца сваіх меркаванняў. Кожны чалавек мае права на свабоднае выказванне свайго меркавання; гэта права ўключае ў сябе свабоду шукаць, атрымліваць і распаўсюджваць усялякага роду інфармацыю і ідэі, незалежна ад дзяржаўных межаў, вусна, пісьмова ці праз друк альбо мастацкія формы выражэння ці іншым шляхам на свой выбар», – гаворыцца ў заяве.

У дакуменце падкрэсліваецца, што карыстанне гэтым правам накладае асаблівыя абавязкі і асаблівую адказнасць. «Гэта права, адпаведна, можа быць звязанае з некаторымі абмежаваннямі, якія, аднак, павінны быць устаноўленыя законам і зʼяўляцца неабходнымі для павагі і рэпутацыі іншых асоб і для аховы дзяржаўнай бяспекі, грамадскага парадку, здароўя і маральнасці насельніцтва», – гаворыцца ў заяве.

Акрамя таго, дапушчальныя абмежаванні свабоды выказвання меркавання ўтрымліваюцца ў артыкуле 20 Пакту, які забараняе прапаганду вайны, выступленні на карысць нацыянальнай, расавай, рэлігійнай нянавісці, а таксама выступленні, якія ўяўляюць сабой падбухторванне да дыскрымінацыі, варожасці або гвалту, падкрэсліваюць праваабаронцы.

Улічваючы гэтыя, устаноўленыя Міжнародным пактам аб грамадзянскіх і палітычных правах, дапушчальныя абмежаванні свабоды выказвання меркавання, пры аналізе тэкстаў, якія былі размешчаныя на сайце 1863х.com, даследчыкам трэба было высветліць, ці трапляюць гэтыя матэрыялы пад дапушчальныя абмежаванні свабоды выказвання меркавання.

У выніку аналізу даследчыкі прыйшлі да высновы, што змешчаная ў дзевяці артыкулах інфармацыя не ўтрымлівае прыкмет заклікаў да вайны, гвалту або выступленняў на карысць расавай, нацыянальнай або рэлігійнай варожасці, не ўяўляе пагрозы нацыянальнай бяспецы, грамадскаму парадку або здароўю і маральнасці насельніцтва, адзначаюць праваабаронцы.

«Матэрыялы ўяўляюць сабой не што іншае, як думкі аўтара адносна тых ці іншых гістарычных падзеяў, фактаў, утрымліваюць крытычныя заўвагі адносна геапалітычных канцэпцый і вонкавай палітыкі некаторых дзяржаў. Аўтар не меў на мэце прыніжэнне прадстаўнікоў нейкіх канкрэтных нацыянальнасцяў, этнічных ці расавых груп», – падкрэсліваецца ў заяве.

Адзначаецца, што матэрыялы аўтарства Пальчыса, якія былі размешчаныя на сайце 1863х.com, зʼяўляюцца дапушчальнай формай выказвання свайго меркавання і, адпаведна, не могуць праследавацца ў крымінальным парадку.

«Забарона распаўсюджвання малюнкаў і матэрыялаў парнаграфічнага зместу зʼяўляецца дапушчальным абмежаваннем свабоды выказвання меркавання і мае на мэце абарону маральнасці насельніцтва. Аднак пры гэтым мы лічым, што разавае выкарыстанне ілюстрацыі з парнаграфічным малюнкам, які, на думку Пальчыса, павінен быў прадэманстраваць карыстальнікам рэсурсу 1863х.com недапушчальныя падыходы да падачы інфармацыі некаторымі ўэб-рэсурсамі, зʼяўлялася недальнабачным крокам, але не павінна стаць падставай для прызначэння пакарання ў выглядзе пазбаўлення волі. У гэтым выпадку Пальчыс не пераследаваў карыслівыя ці якія-небудзь іншыя гнюсныя мэты. Аналіз правапрымяняльнай практыкі па некаторых падобных рэзанансных выпадках сведчыць, што пакаранне ў выглядзе пазбаўлення волі па іх судамі не ўжывалася», – гаворыцца ў заяве.

Праваабаронцы лічаць, што ў крымінальным пераследзе Пальчыса ёсць палітычны матыў уладаў, які мае на мэце спыненне яго публічнай дзейнасці або прымус да змены яе характару.

МЯ, паводле БелаПАН

Глядзі таксама
Каментары