Выданне «Ежедневник» (ej.by) апублікавала вытрымкі з афіцыйнага адказу Міністэрства аховы здароўя на запыт аб выкарыстанні ў Беларусі карэйскай прышчэпкі «Eupenta» і французскай «Imovax Polio». Сёлета ў вёсцы Вялікія Круговічы (Ганцавіцкі раён) пасля ўвядзення гэтых прышчэпак памёр двухмесячны Кірыл Рабцэвіч.
Журналісты ej.by даведаліся, што «Eupenta» не прайшла рэгістрацыю ў Паўднёвай Карэі. На сайце epharmakorea.or.kr, які дзейнічае ад імя карэйскага Ministry of Food and Drug Safety, гэтая прышчэпка знаходзіцца ў раздзеле навуковых распрацовак.
Паводле ej.by, выпрабаванні «Eupenta» праваліліся ў ЗША, Кітаі і Філіпінах. Аўтары расследавання адзначаюць, што «Eupenta» з’явілася ў Беларусі ў 2017 годзе і «не прайшла ў нашай краіне ніякіх выпрабаванняў і праверак». Больш таго, выкарыстанне незарэгістраванай вакцыны ў Беларусі забараняе закон «Аб лекавых сродках». Выключэннем можа быць увоз незарэгістраваных лекаў з мэтаю выпрабаванняў падчас масавых эпідэміяў.
Мінздароўя ў сваім адказе выданню сцвярджае, што прышчэпка трапіла ў Беларусь легальна.
Журналісты выдання недвухсэнсоўна намякаюць на наяўнасць карупцыйнай схемы ў Мінздароўя. Ej.by сцвярджае, што гэтая схема дазволіла праводзіць «выпрабаванні» на беларускіх дзецях, з якімі абышліся як з «біяматэрыялам».
«Паколькі за апошнія гады ніякіх усплёскаў эпідэміяў не было, то можна падумаць, што масавы завоз «Eupenta» адбыўся «для правядзення клінічных выпрабаванняў», іначай мытня б проста не прапусціла тавар. І вось тут самае страшнае, бо ўдзел у выпрабаваннях – гэта добраахвотная справа, за якую плоцяць вялізныя грошы і кампенсацыі, калі нешта пойдзе не так. На такія выпрабаванні фармацэўтычныя кампаніі выдаткоўваюць гады і дзясяткі мільёнаў долараў. А тут для карэйскай кампаніі бясплатна зладзілі палігон выпрабаванняў на беларускіх дзецях. Можа, не зусім бясплатна?», – піша ej.by.