Паводле агенцыі «Ёнхап», Паўднёвая Карэя і Беларусь вядуць перамовы пра скасаванне візаў. Амбасадар Янг Чунг Мо падкрэслівае, што скасаванне візаў патрэбная абодвум краінам: «Нашыя краіны маюць патэнцыял для пашырэння двухбаковай супрацы ў інфармацыйнай і тэхналагічных сферах».
Таваразварот паміж Беларуссю і Паўднёвай Карэяй складае $100 млн, мы набываем электроніку і аўтамабільныя запчасткі, карэйцы купляюць беларускія ўгнаенні.
Амбасадара, аднак, больш хвалюе прыток турыстаў: летась Паўднёвую Карэю наведала толькі тысяча нашых суайчыннікаў.
«Візавыя нязручнасці перашкаджаюць вандроўкам нашых народаў», – кажа Янг Чунг Мо.
Да таго ж, усе суседзі Беларусі ўжо маюць з Паўднёвай Карэяй бязвізавыя пагадненні.
Пакуль без візаў на тэрыторыю Паўднёвай Карэі беларусы могуць патрапіць толькі з дыпламатычным пашпартам альбо пры транзіце ў Злучаныя Штаты Канаду, Новую Зеландыю і Японію. Консульскі збор за выдачу віз у амбасадзе Паўднёвай Карэі ў Менску вагаецца ад 40 да 60 долараў у залежнасці ад тыпу візы.
ДД, belsat.eu
