Арсеній Яцэнюк падаў у адстаўку


У праграме «10 хвілінаў з прэмʼер-міністрам», якая транслюецца на ўкраінскіх тэлеканалах, кіраўнік ураду заявіў пра рашэнне скласці паўнамоцтвы. Партыя Парашэнкі ўжо знайшла яму замену.

«Я прыняў рашэнне скласці паўнамоцтвы прэмʼер-міністра Украіны», – заявіў ён, дадаўшы, што ў аўторак адпаведнае прадстаўленне будзе ўнесенае на разгляд Вярхоўнай Рады.

«Маё рашэнне прадыктаванае некалькімі прычынамі: палітычны крызіс у дзяржаве развязаны штучна, працэс змены ўраду ператварыўся ў бяздумны бег на месцы, аўтары крызісу сталі закладнікамі абставінаў, зрабілі закладнікамі ўсіх нас: урад, грамадства, дзяржаву», – сказаў Яцэнюк.

Яцэнюк кажа, што не трымаецца за пасаду.

«Кіраўніцтва ўрадам – ​​гэта цяжар, ​​гэта інструмент, а не прывілей. Нельга дапусціць аднаго – дэстабілізацыі выканаўчай улады падчас вайны. Такая перспектыва непазбежная, калі пасля адстаўкі неадкладна не абяруць новага ўраду Украіны», – адзначыў прэмʼер.

Яцэнюк таксама адзначыў, што ганарыцца вынікамі дзейнасці свайго ўраду.

Блок Пятра Парашэнкі заявіў, што падтрымае адстаўку Яцэнюка і вылучыць на пасаду Уладзіміра Гройсмана.

Яцэнюк стаў прэмʼер-міністрам паводле рашэння Вярхоўнай Рады 27 лютага 2014 года.

27 лістапада 2014 года Кабінет міністраў пад старшынёўствам Яцэнюка склаў паўнамоцтвы перад новаабранай на пазачарговых выбарах Вярхоўнай Радай VIII склікання. У той жа дзень Яцэнюк быў ізноў прызначаны кіраўніком ураду.

ДД

Глядзі таксама
Каментары