11:55 Суддзя аб’явіў перапынак да 20 красавіка, бо не з’явіліся сведкі, якія павінны былі даць паказанні наконт таго, што ён нібыта лаяўся матам у РАУС. Новае паседжанне прызначанае на 15:00.
11:44 Суддзя Юрый Гарбатоўскі пытае паводле якой справы журналіст выступае сведкам. Ён адказаў, што выступае сведкам па справе парушэння аўтарскіх правоў выкарыстання знаку «Белсату».
11:38 Аляксандр Любянчук дае паказанні. Адзначае, што ў Першамайскі РАУС яго прывезлі з парушэннямі закону.
11:27 Шмат людзей прыйшлі падтрымаць журналіста. Сярод іх Таццяна Равяка, Максім Жбанкоў. Прысутнічае афіцыйны прадстаўнік «Белсату» Аляксей Мінчонак.
19 красавіка аб 11:30 адбудзецца судовы працэс над аператарам нашага тэлеканалу.
31 сакавіка ў Менску адбыліся ператрусы ў двух офісах «Белсату». У адным з офісаў, калі ў яго ўварваліся міліцыянты, знаходзіўся Аляксандр Любянчук. Аператара, які акрэдытаваны беларускім МЗС, завезлі ў Першамайскі РУУС Менску, дзе на яго склалі пратакол за нецэнзурную лаянку (дробнае хуліганства, артыкул 17.1 Кодэксу аб адміністрацыйных правапарушэннях).
«Спрабаваў глядзець супрацоўнікам у вочы, праз пэўны час яны адварочвалі вочы ўбок, не вытрымлівалі майго позірку. Пра які тут сорам казаць? Некаторыя казалі: «Вы ж разумееце, нам далі заданне – мы выконваем, мы ж самі людзі падуладныя». Зразумела, яны ведаюць, што робяць», – распавёў пра ператрус Аляксандр Любянчук.
Як міліцыянты паводзілі сябе падчас ператрусу
Пасля гэтага Любянчука забралі ў Цэнтр ізаляцыі правапарушальнікаў на Акрэсціна, пазней адпусцілі.
Міліцыянты накіравалі пратакол у суд, і цяпер Любянчуку пагражае штраф альбо арышт да 15 содняў.
Заахвочваем прыйсці заўтра ў суд і падтрымаць нашага калегу. Талбухіна, 9, аб 11:30.
Чытайце таксама:
НМ, belsat.eu