Амерыканскі флот рыхтуе падводную оптавалаконную сувязь на выпадак вайны ў космасе

Ваенна-марскія сілы ЗША карыстаюцца спадарожнікавай і іншымі камунікацыйнымі сістэмамі для перадачы інфармацыі, аднак у часы вайны – што рабіць, калі спадарожнікі будуць знішчаныя, а радыёсувязь падаўленая?

Вайна ў Данбасе, досвед якой вывучаюць арміі НАТА, паказала, што сучасныя баявыя дзеянні паміж тэхналагічна развітымі дзяржавамі суправаджаюцца актыўнай барацьбой у кіберпрасторы і радыёэфіры.

У сувязі з гэтым Агенцыя перспектыўных абаронных даследчых праектаў Пентагона (DARPA) распрацоўвае спецыяльнае рашэнне для флоту – Тактычную падводную сеткавую архітэктуру (TUNA), якая мае ўяўляць з сябе сетку плавучых буёў, якія звязаныя оптавалаконным кабелям, гаворыцца ў паведамленні DARPA.

Замова на распрацоўку сістэмы зʼявілася ў пачатку 2014 года, а цяпер праграма падыходзіць да апошняга этапу распрацоўкі.

Выпрабаванні сістэмы TUNA. Відэа DARPA.

Цяпер, у выпадку адсутнасці сувязі ў нейкім вялікім раёне самалёты і караблі змогуць скінуць у мора шмат буёў з батарэяй, перадатчыкам і сістэмай падключэння, якія будуць звязаныя вельмі тонкім, але трывалым оптавалаконным кабелем, які зможа бяспечна перадаваць інфармацыю пад вадой на сотні і нават тысячы кіламетраў.

Плануецца, што пражыць сістэма ў баявых умовах зможа да 30 дзён, пасля чаго звычайныя камунікацыі будуць адноўленыя.

Схема працы. Малюнак DARPA.

Нейтралізаваць такую кабельную сістэму можна будзе толькі дакладна ведаючы месцазнаходжанне буёў.

Аляксандр Гелагаеў, belsat.eu