20 чэрвеня актывісты, выступаючы супраць працы «рэстарана на костках» «Поедем поедим», наведалі Міністэрства культуры, каб паспрабаваць прымусіць улады на афіцыйным узроўні звярнуць увагу на праблему забаўляльнага комплексу ў месцы масавых расстрэлаў.
Да сёння ніякіх рэакцыяў з боку ўладаў не было, акрамя адміністрацыйных пратаколаў. Павел Севярынец разам з паплечнікамі абмеркаваў канфліктную сітуацыю з намеснікам міністра культуры Аляксандрам Яцко. Аднак значных зрухаў у пазіцыі ўладаў не пабачыў.
«Мы прапанавалі перагледзець ахоўную зону і вярнуцца да ахоўнай зоны з 2003 году. Але я пабачыў бюракратычны лёд. Гэтую справу правялі для галачкі. Я лічу, што Мінкульт небескаштоўна перакройвае Курапаты. Мяркуючы па ўсім, рашэнне будзе прымаць Лукашэнка. Яны ў разгубленасці і чакаюць. Яны проста пакрываюць карупцыю. Мы будзем стаяць, пакуль аб’ект не перанясуць ці не закрыюць», – кажа Севярынец.
Актывісты патрабуюць прыпыніць дзейнасць «Поедем-поедим» да высвятлення дадатковых абставінаў законнасці будаўніцтва аб’екта. Таксама яны просяць адмовіцца ад практыкі прыцягнення да адміністратыўнай адказнасці абаронцаў Курапатаў.
Бестэрміновая акцыя пратэсту побач з рэстаранам «Поедем поедим» ля ўрочышча працягваецца ўжо 21 дзень. Уласнік прапаноўваў актывістам грошы за спыненне блакады комплексу.
Тым часам абаронцы Курапатаў звярнуліся з адкрытым лістом да замежных лідараў. Яго падпісалі нобэлеўская лаўрэатка Святлана Алексіевіч, паэты Уладзімір Някляеў і Алесь Пашкевіч ды іншыя палітычныя і грамадскія дзеячы.
Ахоўная зона ў 2010 годзе, калі падпісалі дамову пра будаўніцтва«аб’екту прыдарожнага сэрвісу», праходзіла пасярэдзіне сённяшняга «Паедзем, паядзім». У 2012 годзе Мінкульт і Генпракуратура заўважылі, што будуецца зусім іншы аб’ект, чымся заяўлены першапачаткова, і загадалі спыніць будаўніцтва. Але праз два гады ахоўную зону вакол мемарыялу зменшылі ў два разы, у выніку чаго стала магчымае будаўніцтва «Бульбаш-холу» – цяпер «Паедзем, паядзім» і бізнес-цэнтру, які пасля леташніх пратэстаў гэтак і не паўстаў.
ДР belsat.eu
