Ці азначае гэта агонію рэжыму Башара аль-Асада?
Тысячы сірыйцаў бягуць з радзімы ў Лівію пасля актывізацыі баявых дзеянняў у сталіцы. Прэзідэнт Башар аль-Асад увёў танкі ў Дамаск у першы дзень святога для мусульманаў месяца Рамадан.
Баявыя дзеянні ў Дамаску істотна актывізаваліся ў чацвер, пасля смерці швагра і стрыечнага брата Башара аль-Асада, якія гралі ключавыя ролі ў супрацьстаянні з паўстанцамі. Сёння ў Дамаску быў забіты таксама кіраўнік сірыйскай выведкі, генерал-маёр Гішам Бахт’яр.
Сірыйскія паўстанцы пашырылі свой кантроль на мяжы з Турцыяй ды Іракам, што дае ім магчымасць бесперашкодна ўвозіць зброю. {movie}Жыхары ўцякаюць з Сірыі|right|5438{/movie}
Баявыя дзеянні змушаюць людзей пакідаць краіну
Колькасць уцекачоў з Сірыі, як падаюць ліванскія крыніцы, складае ў сярэднім каля 5 тыс. чалавек на дзень. За апошнія содні краіну пакінулі 8,5 тыс. чалавек.
Ліванскі ўрад прапаноўвае для часовага размяшчэння ўцекачоў школьныя будынкі і арганізоўвае дапамогу з боку іншых арабскіх краінаў.
Шмат людзей, у тым ліку прадстаўнікі дыпламатычных і гуманітарных місіяў, спешна пакідаюць краіну.
Пазіцыя Расеі
Напярэдадні на паседжанні ААН заходнія краіны прапанавалі ўвесці санкцыі супраць сірыйскіх уладаў, калі яны не спыняць гвалту ў краіне. Расея і Кітай рэзалюцыю заблакавалі.
Афіцыйны прадстаўнік расейскага Міністэрства замежных справаў Аляксандр Лукашэвіч заявіў, што праект рэзалюцыі быў «абсалютна непрымальны», і заклікаў заходнія краіны паўплываць на сірыйскіх паўстанцаў, каб менавіта яны спынілі баі. «Прыняцце рэзалюцыі ААН з санкцыямі ў дачыненні Сірыі будзе наўпроставым падтрыманнем рэвалюцыйнага руху», – такое меркаванне выказаў журналістам расейскі міністр замежных справаў Сяргей Лаўроў.
belsat.eu
