Праводле інфармацыі, прадстаўленай „Белсату” прэс-сакратаром Акруговай пракуратуры ў Варшаве, затрыманага Андрэя Пыжыка чакае сёння допыт, на падставе якога будзе прынята рашэнне аб магчымым часовым арышце былога капітана міліцыі.
Цяпер Андрэя Пыжыка ўтрымліваюць у паліцыі.
Паводле жонкі Андрэя Пыжыка Юліі, 4 чэрвеня яго запрасіў да сябе ўчастковы, сказаўшы, што з’явіліся нейкія праблемы з атрыманнем палітычнага прытулку. Пасля гэтага жанчына даведалася, што Андрэя Пыжыка могуць дэпартаваць у Беларусь цягам некалькіх дзён.
Жонка затрыманага таксама паведаміла, што цяпер яна мае намер наняць адваката, які будзе займацца прадстаўленнем інтарэсаў Андрэя Пыжыка.
У чым правініўся былы міліцыянт?
Афіцыйна беларускія ўлады вінавацяць Андрэя Пыжыка ў “ілжывых сведчаннях, крадзяжы і прысвойванні маёмасці ”.
Былы жодзінскі следчы быў вымушаны ўцячы ў Польшчу пасля адмовы распачаць крымінальную справу супраць «афганца» Аляксандра Камароўскага, калі той вылучаўся ў Жодзінскі гарадскі Савет дэпутатаў.
Андрэй Пыжык распавёў, як апазіцыйнаму кандыдату падкінулі фальшывыя долары – на гэтай падставе Камароўскага арыштавалі ды адкрылі крымінальную справу. Былы міліцыянт таксама засведчыў, што падчас расследавання пракурор горада Жодзіна Віктар Літвіненка пацвердзіў, што справа – палітычная. «Віктар Данілавіч сказаў дакладна і наўпрост: вы што, не разумееце, у чым сітуацыя? Камароўскі балатуецца ў дэпутаты і ён не павінен прайсці», – заявіў Андрэй Пыжык у сваім відэазвароце.
{movie}Андрэй Пыжык у фільме “Страх у краіне спакою” (Фрагменты)|right|4618{/movie}
Былы следчы таксама выступіў у якасці эксперта ў фільме «Белсату» «Страх у краіне спакою», прысвечаным тэракту ў менскім метро. У прыватнасці, ён прааналізаваў відэазапісы з камераў назірання, запісаныя ў дзень выбуху, ды ацаніў імавернасць таго, што выбухоўку саматужна вырабілі ў сутарэнні. «Зарганізаваць гэты тэракт магла добра арганізаваная група. У Беларусі толькі КДБ гэта мог зрабіць», – падсумаваў Андрэй Пыжык.
Польшча мусіць выканаць працэдуру
Беларускі бок абвесціў Андрэя Пыжыка ў вышук праз Інтэрпол. Гэта не першы выпадак, калі паводле падобнага запыту польская паліцыя затрымлівае таго, хто хаваецца ад палітычнага пераследу з боку Менску.
Гэтак, у снежні 2011 г. у варшаўскім аэрапорце затрымалі экс-кандыдата на прэзідэнта Алеся Міхалевіча. Пры гэтым палітык ужо меў статус уцекача ў Чэхіі. У справу ўмяшалася польскае Міністэрства замежных справаў, і Міхалевіча адпусцілі.
Справу ўскладняе тое, што Андрэй Пыжык, паводле звестак «Белсату», афіцыйнага статусу ўцекача не мае. Аднак без адмысловага рашэння польскага суда былога міліцыянта ўладам Беларусі не выдадуць.
belsat.eu