Дозы апраменьвання ад медычнага абсталявання значна перавышаюць тыя, што атрымліваюць жыхары тэрыторыяў, забруджаных пасля аварыі на Чарнобыльскай АЭС.
Пра гэта заявіў загадчык лабараторыі радыяцыйнай бяспекі Рэспубліканскага навукова-практычнага цэнтра гігіену, прадстаўнік ураду ў Навуковым камітэце ААН у справе дзеяння атамнай радыяцыі, старшыня Нацыянальнай камісіі радыяцыйнай абароны пры Савеце Міністраў Якаў Кёнігсберг 30 траўня на прэс-канферэнцыі ў Менску.
Паводле яго, медычнае апраменьванне не нармуецца – у большасці выпадкаў яно неабходнае для дыягностыкі або лячэння хваробаў. У развітых краінах людзі атрымліваюць ўсё больш радыяцыі ад абследаванняў або лячэбных працэдураў. Напрыклад, за адзін сеанс рэнтгенаўскага сканавання доза радыяцыі складае каля 8 МЗв, а пры некаторых відах медычнай дыягностыкі яна перавышае 16 МЗв. Для параўнання: нарматыў гадавога апраменьвання для насельніцтва Беларусі ўстаноўлены ў 1 МЗв. “На жаль, ёсць апараты дастаткова старыя, якія даюць вялікія дозы”, – адзначыў Кенігсберг.
Ён паведаміў, што сёлета праблема медычнага апраменьвання разглядалася на 59-й сесіі Навуковага камітэту ААН у справе дзеяння атамнай радыяцыі, у якой брала ўдзел Беларусь. Усе чальцы камітэту забавязваюцца сабраць у сваіх краінах адпаведную інфармацыю: пра дозы радыяцыі ў выніку медычных працэдураў, стан апаратуры, колькасць персаналу ў гэтай галіне. У выніку Беларусь трапіць у адну з чатырох катэгорыяў краінаў паводле ўзроўню выпраменьвання для мэтаў дыягностыкі ды лячэння насельніцтва.
Якаў Кёнігсберг дадаў, што ў выніку аварыі на АЭС у Японіі беларусы не пацярпелі.
belsat.eu
