500 долараў заробку – толькі абяцанні. У пошуку лепшага жыцця тысячы беларусаў выязджаюць з краіны. Афіцыйная статыстыка сведчыць пра істотны адток кадраў у шматлікіх галінах эканомікі. Толькі за першыя чатыры месяцы года з будаўніцтва звольніліся 38 тысячаў чалавек, з прамысловасці – 70 тысячаў.
Паводле “Белстату”, на першага траўня ў рэальным сектары былі занятыя 4 мільёны пяцьсот шэсцьдзесят з паловаю тысячаў чалавек. А гэта менш на 2 адсоткі, або больш за сто тысячаў чалавек, чым за адпаведны перыяд летась. Прычым адток кадраў будзе павялічвацца, бо гэтаму спрыяе стварэнне Адзінай эканамічнай прасторы. Галоўная прычына адтоку кадраў – грашова-крэдытная палітыка дзяржавы. І з’язджаюць не толькі спецыялісты, але і прадпрымальнікі, імкнецца выехаць і моладзь.
Старшыня Беларускага кангрэсу дэмакратычных прафсаюзаў Аляксандр Ярашук зазначае, што да апошняга часу, пакуль разрыў у заробках паміж Расеяй і Беларуссю не стаўся значным, не было ніякіх афіцыйных звестак пра тых, хто з’ехаў за мяжу. Было прынята, што ў Беларусі беспрацоўных практычна няма. А значыць, каму выязджаць?
“У нас беспрацоўнымі лічацца толькі тыя, хто звярнуўся ў Цэнтр занятасці, а людзі маюць дзве вялікія прычыны, каб туды не звяртацца. Першае: проста здзеклівы памер дапамогі для беспрацоўных – дзесьці ў памеры 10 долараў. А другое, што яшчэ змушаюць да гэтак званых грамадскіх працаў. Пры агульнапрынятай статыстыцы мы б мелі не 0,7 % беспрацоўных, а ўсе 7–10 %”, – кажа спадар Ярашук.
Адмысловец падкрэслівае, што прынамсі каля паўмільёна беларусаў працуюць за мяжою. Моладзь пасля сканчэння ВНУ задумваецца аб працы перадусім на Захадзе, калі рабочыя накіроўваюцца збольшага на Усход.
belsat.eu