Міжнародны дзень свабоды медыяў. Свята для тысяч журналістаў, рэпарцёраў, выдаўцоў. Правакатары, нагнятальнікі панікі, шпіёны Захаду… Спіс азначэнняў, якія ўжывае кіраўнік краіны, кажучы пра незалежных журналістаў, у 2011 г. значна пашырыўся. Медыі давалі ўласную ацэнку эканамічнаму крызісу, дэвальвацыі, продажу стратэгічных прадпрыемстваў Расеі, трагедыі ў менскім метро, а сёлета – смяротнаму пакаранню для меркаваных выканаўцаў тэракту. У 2012 г. Беларусь трапіла ў дзясятку краінаў з найбольш жорсткаю цэнзураю і заняла 193-е месца са 197 у рэйтынгу свабоды медыяў.
Журналісты “Радыё Рацыя” пачалі адзначаць сваё свята яшчэ ўчора ўвечары, калі ў менскі офіс завіталі з ператрусам працаўнікі міліцыі. Паводле журналіста радыё Змітра Косціна, праваахоўнікі тлумачылі візіт аглядам кватэраў, што месцяцца недалёка ад плошчы, дзе адбудзецца парад 9 траўня. Выключна небяспечным падчас святкавання Дня Перамогі міліцыянтам падаліся ноўтбук і сістэмны блок рэдакцыйнага камп’ютара, якія былі сканфіскаваныя.
“Радыё Рацыя” і тэлеканал “Белсат” – у падобнай сітуацыі, яны працуюць у Беларусі на птушыных правах. Пытанне акрэдытацыі доўгія гады застаецца не вырашаным. Тым часам, паводле Міжнароднага камітэту абароны журналістаў, Беларусь ва ўзроўні свабоды медыяў займае сёння 193-е месца сярод 197 краінаў свету.
“Гэта, вядома, красамоўны вынік, бо Беларусь сярод такіх краінаў, як Паўночная Карэя ды Іран. Ведаючы, што за просты збор інфармацыі людзей затрымліваюць і збіваюць, што за выказванне думак людзей пераследуюць, у тым ліку і ў судовым парадку – гэта добрае акрэсленне сітуацыі. Для нашага радыё мінулы год не адрозніваўся асабліва ад папярэдняга, хіба толькі не было ператрусу, як адбылося на “Белсаце” і на “Еўрарадыё”. Таксама затрымліваліся журналісты падчас акцыяў, і не скажу, што лёгка было і што лёгка стала цяпер. Хіба што лёгка не было ніколі”, – кажа Зміцер Косцін.
belsat.eыu