Прысуджаны да 3 гадоў турмы за ўдзел у дэманстрацыі супраць выбарчых фальсіфікацыяў 19 снежня 2010 г., пазней памілаваны, 23-гадовы апазіцыянер ізноў вярнуўся ў вязніцу. Яго асудзілі за крадзеж металалому з зачыненай фабрыкі.
Пасля затрымання ў снежні 2010 г. апазіцыянер страціў працу слесара на Барысаўскім заводзе аўтатрактарнага абсталявання (БАТЭ), быў адлічаны з ВНУ. Як паведамілі ягоныя бацькі, з-за прысуду на палітычным працэсе малады чалавек не мог знайсці працы.
Малчанаў, каб мець за што жыць і дапамагчы цяжка хворым бацькам, пачаў збіраць металалом. 10 красавіка гэтага года ён стаў перад судом, абвінавачаны ў крадзяжы металалому на суму каля 9 долараў, як сам кажа, з недабудаванай і закінутай 20 гадоў таму фабрыкі, за што атрымаў 1,5 года калоніі строгага рэжыму. Апазіцыянер падкрэслівае, што да ягонага затрымання міліцыя не цікавілася лёсам аб’екту. Паводле актывіста, гэта помста праваахоўных органаў.