Пад наглядам і кантролем спецслужбаў можа быць кожны. Калі на вашым камп’ютары ўсталяваны пэўны вірус. Чарговую хакерскую атаку выявіў партал “Хартыя’97”. Вірус быў скіраваны супраць 15 асобаў і хаваўся ў файле нібыта з Адміністрацыі прэзідэнта. З дапамогаю гэтага віруса магла збірацца інфармацыя з заражаных камп’ютараў. Праграму прыслалі Ірыне Халіп, журналістцы і жонцы экс-кандыдата на прэзідэнцтва Андрэя Саннікава. Аналіз віруса паказаў, што з яго дапамогаю адсочваліся камп’ютары палітычных, грамадскіх дзеячаў і журналістаў.
Паводле інфарматыка Уладзіміра Вараб’ёва, большасць хакерскіх атак ёсць спробаю зарабіць на інфармацыі ці на доступе да камп’ютара. “Думаю, што ў беларускіх спецслужбаў цалкам хапае кваліфікацыі, каб зладзіць гэткую атаку. Галоўная хіба абароненасці інфармацыі – гэта чалавечы фактар, што якраз пацвярджае сённяшні выпадак”, – кажа Вараб’ёў.
Паводле праграміста, нават добрыя антывірусныя праграмы не гарантуюць поўнай бяспекі вашых асабістых звестак. Адмысловец раіць быць выключна ўважлівымі ды правяраць усе вонкавыя файлы перад іх запускам.
belsat.eu