Пра гэта паведаміў начальнік кіраўніцтва рэабілітацыі пацярпелых тэрыторыяў дэпартаменту дзеля ліквідацыі наступстваў катастрофы на Чарнобыльскай АЭС Міністэрства надзвычайных сітуацыяў Генадзь Анцыпаў 25 красавіка на прэс-канферэнцыі ў Менску.
Ён патлумачыў, што на тэрыторыі зоны эвакуацыі або адчужэння і прылеглай да яе часткі зоны адсялення сфармаваны Палескі дзяржаўны радыяцыйна-экалагічны запаведнік. “Як вы разумееце, гэта не заказнік, які пасля выканання задачы можа страціць свой статус, – дадаў Анцыпаў. – 216 000 га – гэта зона, назаўсёды закансерваваная ў прыродаахоўных мэтах”.
“Што да астатняй зоны адсялення, жыццё не стаіць на месцы, – расказаў прадстаўнік дэпартаменту. – Кожныя трыццаць гадоў колькасць стронцыю і цэзію памяншаецца ўдвая, а гэта азначае, што стала памяншаецца шчыльнасць забруджання. За гэты час больш як 40 % стронцыю і цэзію распалася, гэта значыць, адбываецца самаачышчэнне. У зоне адсялення новых паселішчаў не з’яўляецца, але з гледзішча ўцягвання ў выкарыстанне земляў – гэты працэс ідзе. Але ён не фарсіруецца – з 1993 года ўвялі ў абарот 17 300 га, тады як вывелі 264 000 га сельгасугоддзяў. Прычым за апошнія два гады мы ўвялі ў сельгасабарот толькі чацвёртую частку з 10 000 абследаваных на гэты прадмет гектараў земляў”.
belsat.eu
