Актывісты гарадзенскай суполкі “Маладога фронту” распачалі збор подпісаў за ўвекавечванне памяці паўстання 1863 года.
У якасці месца для манументу яны прапаноўваюць пляцоўку ля Дому прафсаюзаў. Размешчаная побач былая дамініканская гімназія была адным з асяродкаў паўстання, а насупраць будынку ўстановы захаваўся “Дом Фукса”, дзе неаднаразова бываў Кастусь Каліноўскі.
“Будучы год – юбілейны для паўстання, таму хочацца разварушыць чыноўнікаў, а таксама абудзіць неабыякавых да мінуўшчыны гарадзенцаў. Тым больш што постаць Каліноўскага не страчвае сваёй актуальнасці”, – распавёў кіраўнік арганізацыі Алесь Кіркевіч.
Актывіст адзначае, што ўсталяваць помнік і дзве памятныя табліцы ў гонар паўстання збіраліся яшчэ ў 1989 годзе – на адпаведнае рашэнне Гарадзенскага гарвыканкаму. Але з запланаванага з’явілася толькі адна табліца, якая да рамонту вісела на будынку чыгуначнага вакзалу.
Мясцовыя арганізацыі “МФ” яшчэ ў 90-я гады рабілі спробы дамагчыся ад чыноўнікаў выканання рашэння.
belsat.eu