79-гадовага пенсіянера адправілі на прымусовае лячэнне за «абразу прэзідэнта»


Аляксандр Лапіцкі

Аляксандр Лапіцкі не быў вядомым грамадскім актывістам і да прысуду суда Фрунзенскага раёну сталіцы пра яго мала хто ведаў. Але 12 красавіка яго прызналі вінаватым у абразе прадстаўнікоў улады, суддзяў, прэзідэнта і накіравалі на прымусовае лячэнне. Экспертыза паказала, што ў пенсіянера маецца хранічнае псіхічнае засмучэнне, пішуць naviny.by.

Алег Воўчак і шэраг іншых праваабаронцаў лічаць, што Аляксандра Лапіцкага варта прызнаць палітвязнем, бо мужчыну пакаралі за крытыку ўладаў і грамадзянскую пазіцыю.

Сапраўды, сцвярджае Воўчак, у лістах Лапіцкага, якія той адпраўляў па электроннай пошце, былі неадназначныя словы і выразы. У паведамленнях пенсіянер выкарыстаў словы «казлы», «ідыёты» і «адмарозкі», «окабанели», «обнаглели», «козлы», «идиоты», «отморозки», «свиньи», «на выдумку и клевету судьи», «вся глубина нравственной деградации», аднак у судзе поўны тэкст лістоў не зачытваўся, таму кантэкст застаецца незразумелым.

«У прысудзе ідзе пералік абраз, але няма дакладнага вызначэння, каму менавіта з беларускіх афіцыйных асобаў яны былі накіраваныя. Вядома, Лапіцкі выкарыстаў непрыстойныя для выражэння, але, на мой погляд, гэта адміністрацыйнае правапарушэнне, а не злачынства, за якое пажылога чалавека трэба адправіць на прымусовае лячэнне ў псіхіятрычны шпіталь» – кажа Алег Воўчак.

Частка лістоў тычылася абставінаў крымінальнай справы ў дачыненні да сына Лапіцкага, якога судзілі па абвінавачванні збіцця жонкі. Тады ён прадстаўляў інтарэсы свайго сына.

У 2011 годзе пенсіянер пачаў адсочваць разбор з нагоды выбуху ў менскім метро. У сваім блогу ён дэталёва распісваў, што, на ягоную думку, у трагедыі вінаваты прэзідэнт Беларусі ды іншыя службовыя асобы.

Праваабаронца таксама адзначае, што міліцыя неаднаразова адмаўляла ў завядзенні крымінальнай справы, аднак у гэтым годзе справа дайшла да суду.

Кіраўнік Беларускага дому правоў чалавека Таццяна Равяка адзначыла, што заявы аб прызнанні Лапіцкага палітвязням пакуль заўчасныя – прысуд не набыў сілу, а абвінавачваны цяпер знаходзіцца на волі.

«Аднак калі ён усё ж такі будзе накіраваны на прымусовае лячэнне, мы будзем разглядаць пытанне аб прызнанні яго палітвязнем, бо парушаны стандарт свабоды выказвання меркавання».

Адвакат Лапіцкага мае намер абскардзіць вынесены прысуд.

ДР, belsat.eu

Глядзі таксама
Каментары