Карэспандэнты “Белсату” распыталі жыхароў Жодзіна, чаму іхны зямляк Яўген Літвінковіч, які стаў зоркаю папулярнага шоу «Украіна мае талент», не змог прабіцца на беларускую эстраду.
Рэспандэнты назвалі розныя прычыны: адсутнасць сувязяў, удачы, магчымасцяў, дзяржаўнага фінансавання, недахоп прафесіяналаў, малую колькасць беларускіх тэлевізійных каналаў. Толькі адна апытаная выказала практычную параду: “Звярнуць увагу на найвышэйшае кіраўніцтва і звярнуцца туды, калі ён сапраўды таленавіты. Не трэба рук апускаць”.
29-гадовы Яўген Літвінковіч выступіў на ўкраінскім шоу (аналагу расейскай «Хвіліны славы») з песняю “Sweet People”, якую спявачка Alyosha прэзентавала на “Еўрабачанні-2010”. Зала пляскала беларусу стоячы, а сябры журы прызналі, што Яўген песню выканаў лепей.
«У роднай Беларусі Жэня не раз спрабаваў прабіцца на вялікую сцэну. Аднак пасля чарговага расчаравання адкрыў уласную справу і вырашыў, што будзе жыць, як усе. Калі ж да Жэні дакаціліся чуткі пра шоу, якое змяняе жыцці ды ажыццяўляе мары, то хлопец вырашыў рызыкнуць – можа быць, гэта ягоны шанец», – гэтак прэзентавалі нашага суайчынніка ўкраінцам. Спявак адчыніў у родным Жодзіне невялікую кавярню «У Жэкі», дзе ўсё робіць сам: гатуе, стаіць за бар-стойкаю, а таксама спявае з сябрамі караоке.
belsat.eu
