Кіраўнік праваабарончай арганізацыі «Прававая дапамога насельніцтву» пракаментаваў звесткі пра расстрэл Уладзіслава Кавалёва.
«Тое, што адбылося, цяжка неяк каментаваць. Вядома, калі прашэнне аб памілаванні было адхіленае, то прысуд можа быць выкананы ў любы момант. Але ж мы жывем у трэцім тысячагоддзі. Гэта проста нейкае дзікунства”, – разгублены Алег Волчак.
Паводле яго, першае, што прыйшло ў галаву, калі ён пачуў гэтую навіну, – улада пазбаўляецца ад сведкаў. Чаму, напрыклад, фігурантам у справе аб выкраданні Змітра Завадскага жыццё захавалі, асудзіўшы былых спецназаўцаў на пажыццёвае зняволенне, – меркаваць цяжка. Цяпер у гэтай справе так і застанецца пытанняў больш, як адказаў, зазначае Алег Волчак.
Праваабаронца нагадвае, што справа выбуху ў менскім метро раскалола грамадства і ўдарыла па рэйтынгу прэзідэнта: нягледзячы на хуткае расследаванне і працэс, большасць так і не паверыла, што суд быў справядлівы.
“Неўзабаве гадавіна тэракту, таму Лукашэнка і спяшаўся “закрыць гэтую тэму” – прадэманстраваць, што ў краіне па-ранейшаму пануюць стабільнасць і спакой. Але тое, што яны здзейснілі, – гэта параза судовай сістэмы, параза ўлады і ўсяго грамадства”, – падсумоўвае праваабаронца.
belsat.eu
