Маці асуджанага на смерць Уладзіслава Кавалёва спадзяецца, што пазіцыя Адміністрацыі прэзідэнта паўплывае на лёс ейнага сына.
“У маім сэрцы зацеплілася надзея, што сына не расстраляюць, пакуль скаргу ў дачыненні яго не разгледзяць у Камітэце правоў чалавека ААН”, – сказала Любоў Кавалёва, каментуючы адказ на свой зварот да кіраўніка дзяржавы.
1 лютага маці Кавалёва звярнулася ў Канстытуцыйны суд Беларусі з просьбаю праверыць на адпаведнасць Канстытуцыі Крымінальна-выканаўчы кодэкс, які не прадугледжвае прыпынення смяротнага пакарання ў сувязі са зваротам асуджанага ў міжнародныя інстанцыі дзеля абароны сваіх правоў.
У сувязі з гэтым Кавалёва асцерагаецца, што прысуд у дачыненні ейнага сына, абвінавачанага ў справе аб тэракце ў менскім метро, можа быць выкананы да канчатковага разгляду ў Камітэце правоў чалавека ААН, куды звярнуліся яна і ейная дачка.
У Канстытуцыйным судзе жанчыне адказалі, што права на зварот сюды маюць толькі адмыслова ўпаўнаважаныя Канстытуцыяй органы.
6 лютага Кавалёва разаслала лісты тым, хто мае паводле закону права звяртацца ў Канстытуцыйны суд: Савету Міністраў, абедзвюм палатам Нацыянальнага сходу, у Вярхоўны Суд і прэзідэнту. Яна прасіла іх накіраваць у КС выснову аб неадпаведнасці названага кодэксу Канстытуцыі краіны і факультатыўнага пратаколу да Міжнароднага пакту аб грамадзянскіх і палітычных правах.
18 лютага Кавалёва атрымала адказ з аддзелу ў пытаннях грамадзянства і памілавання Адміністрацыі прэзідэнта. У ім сказана, што на ейную прапанову “мэтазгодна правесці комплексны прававы аналіз заканадаўства з удзелам кампетэнтных дзяржаўных органаў”.
У сваю чаргу праваабаронца Раман Кісляк, які кансультуе маці Кавалёва ў прававых пытаннях, адзначыў: чалавек, які звярнуўся па абарону сваіх правоў у міжнародныя інстанцыі, мусіць мець магчымасць атрымаць адказ на свой зварот. “Без гэтага такое канстытуцыйнае права – пустая дэкларацыя”, – падкрэсліў ён.
Праваабаронца нагадаў, што адсутнасць у беларускім заканадаўстве механізму прыпынення ў такіх выпадках выключнай захады пакарання ўжо прывяла да пакарання смерцю Васіля Юзэпчука і Андрэя Жука – у 2010 г., а таксама Алега Грышкаўцова і Андрэя Бурдыкі – у 2011 г. “Гэта адбылося нягледзячы на тое, што іхныя справы ў Камітэце правоў чалавека ААН былі зарэгістраваныя і працэдура іх разгляду на сённяшні дзень яшчэ не завершаная”, – падкрэсліў Кісляк.
belsat.eu