Еўразвяз дасць 200 тыс. еўраў на развіццё турызму на Ашмяншчыне


Асобная ўвага надаецца роварнай інфраструктуры.

Праект стварэння турыстычнай інфраструктуры на тэрыторыі Ашмянскага раёну праходзіць узгадненне ва ўрадзе Беларусі. Мяркуецца, што да канца першага кварталу ўсе пытанні будуць развязаныя, і бакі распачнуць працу. Пра гэта заявіла намесніца старшыні Ашмянскага райвыканкаму Галіна Люткоўская. “Праект будзе гістарычна-культурніцкім, – кажа яна. – Мы збіраемся праводзіць фестываль “Гальшанскі замак”, выпусціць вялікі аб’ём друкаванай прадукцыі, гэта і мапы, і паштоўкі, і даведнік пра найлепшых людзей нашага краю, а таксама забяспечыць мультымедыйным суправаджэннем краязнаўчы музей Францішка Багушэвіча”. Каля 60 тыс. еўраў на рэалізацыю праекту дасць Еўразвяз, яшчэ 6 тыс. еўраў – дольнікі.

Удвая больш – каля 120 тыс. еўраў – будзе каштаваць стварэнне роварнай інфраструктуры. У межах гэтага праекту пабудуюць велатрасу ва ўрочышчы Сухая, усталююць рэкламныя ўказальнікі ды выдадуць даведнікі для велатурыстаў.

Што б параілі зрабіць за гэтыя грошы для развіцця Ашмяншчыны беларускія гісторыкі? “Самы значны гістарычны аб’ект у раёне – Гальшанскі замак. Але для яго рэстаўрацыі такой сумы было б, вядома ж, мала. Можна хіба што правесці нейкія частковыя працы. Гальшанскі замак уяўляе з сябе, па сутнасці, руіны, але ўзнавіць адну з вежаў і зрабіць у ёй памяшканне пад музей было б можна, – разважае старшыня аб’яднання “Гісторыка” Зміцер Рагачоў. – Самы ўдалы варыянт – узяць адну гістарычную сядзібу і зрабіць з яе паўнавартасны турыстычны цэнтр. Вылучаных грошай якраз бы хапіла на яе развіццё”.

belsat.eu

Глядзі таксама
Каментары