Бюджэт на алімпійцаў схуднеў разам з дэвальвацыяй.
Калі прадугледжаных у бюджэце на 2012 г. сродкаў для рыхтавання беларускіх спартоўцаў да Летняй алімпіяды ў Лондане будзе недастаткова, Міністэрства фінансаў Беларусі выдзеліць дадатковыя. Пра гэта міністр спорту і турызму Беларусі Алег Качан заявіў на прэс-канферэнцыі ў Менску 9 студзеня.
«У нас ёсць дамоўленасць з Міністэрствам фінансаў: калі будзе прафіцыт бюджэту (а я ўпэўнены, што ён будзе, бо эканоміка працуе нармальна), неабходную колькасць фінансавых сродкаў мы можам перакінуць», – заявіў Алег Качан, адказваючы на пытанне, ці азначае сума 75 млрд руб., якая праходзіла ў бюджэце-2011, памяншэнне выдаткаў у звязку з інфляцыяй.
«Трохразовага памяншэння няма, бо ў 2011 годзе было шмат чаго закуплена. Напрыклад, тое ж акадэмічнае веславанне – лодкі закупілі летась. У рыхтаванні спартоўца інвентар займае самую вялікую долю», – адзначыў міністр спорту і турызму.
Чыноўнік падкрэсліў, што выдаткі на ўдзел спартоўцаў у Алімпійскіх гульнях кампенсуе Міжнародны алімпійскі камітэт. Таксама ў фінансаванні рыхтавання спартоўцаў бяруць удзел аблвыканкамы, паведаміў Качан.
belsat.eu
