Сваякі асуджанага праваабаронцы Алеся Бяляцкага просяць Дэпартамент выканання пакаранняў (ДВП) Міністэрства ўнутраных справаў адпусціць асуджанага праваабаронцу на пахаванне ягонага бацькі.
Віктар Бяляцкі памёр 24 снежня на 84-м годзе жыцця. Пахаванне адбудзецца 27 снежня ў Светлагорску (Гомельская вобласць), паведаміў калега Бяляцкага Валянцін Стэфановіч.
На мінулым тыдні родныя Бяляцкага прасілі адпусціць вязня развітацца з цяжкахворым бацькам. 19 снежня суд Першамайскага раёну дазволіў спатканне Бяляцкага з бацькам. Аднак у следчым ізалятары Жодзіна, дзе цяпер трымаюць праваабаронцу, заявілі, што паперы не аформленыя належным чынам. Акрамя таго, у адміністрацыі СІЗА заявілі, што ў іх няма магчымасці канваяваць Бяляцкага ў Менск. Спроба перааформіць дазвол была беспаспяховаю.
24 снежня Наталля Пінчук зноў звярнулася ў Дэпартамент выканання пакаранняў. “Гэтым разам – з просьбаю адпусціць Бяляцкага на пахаванне бацькі”, – сказаў Стэфановіч. Шанцы атрымаць дазвол ён лічыць мінімальнымі.
Віцэ-прэзідэнт Міжнароднай федэрацыі правоў чалавека, кіраўнік закрытага ўладамі праваабарончага цэнтру “Вясна” Алесь Бяляцкі 24 лістапада быў прысуджаны да чатырох з паловаю гадоў пазбаўлення волі ў калоніі ўзмоцненага рэжыму з канфіскацыяй маёмасці. Яго прызналі вінаватым у хаванні даходаў у асабліва буйным памеры. Падставаю для крымінальнага пераследу Бяляцкага стала інфармацыя пра ягоныя замежныя банкаўскія рахункі, перададзеная ў Менск чыноўнікамі Літвы і Польшчы. Грошы з гэтых рахункаў накіроўваліся на падтрыманне ахвяраў палітычных рэпрэсіяў у Беларусі ды на забеспячэнне ім юрыдычнай дапамогі.
belsat.eu