Рух “Femen”, ужо плануе чарговую акцыю пратэсту ў Менску.
Нягледзячы на здзекі, дзяўчаты не шкадуюць пра паездку. «Мы ні на секунду не пашкадавалі, што ездзілі ў Беларусь, нягледзячы на ўсё, што з намі там адбылося. Мы абяцаем, што будзем прыязджаць, распранацца і перамагаць рэжым Лукашэнкі. Будзем ездзіць, падымаць беларускі народ і паказваць, што гэтых вырадкаў не варта баяцца», – заявіла актывістка “Femen” Іна Шаўчэнка.
“Мы будзем настойваць на выгнанні пасла Беларусі з Украіны. Бо мы лічым, што прадстаўнікі ўлады, якая дазваляе сабе выкрадаць людзей, здзекавацца з іх і забіваць людзей, не маюць права быць у нашай краіне”, – кажа Ганна Гуцол.
Пасля акцыі ля будынку КДБ у Менску, тры актывісткі руху перасталі выходзіць на сувязь. Знайшліся яны толькі на наступны дзень у вёсцы Бякі каля мяжы з Украінай. Іх завезлі туды з завязанымі вачыма, збілі і здзекаваліся, здымаючы ўсё на відэакамеру. Пасля дзяўчат выкінулі ў лесе. Яны выйшлі да вёскі, дзе атрымалі прытулак у хаце мясцовага жыхара да прыезду працаўнікоў украінскага пасольства.
У сваю чаргу, старшыня КДБ Беларусі Вадзім Зайцаў назваў інцыдэнт з актывісткамі “Femen” найгрубейшаю правакацыяй. «Развіваецца найгрубейшая правакацыя, характар і мэты якой трэба будзе вызначыць», – заявіў ён. Зайцаў адзначыў, што ягоныя людзі актывістак руху «не чапалі, як бы гэтага камусьці ні хацелася». Паводле кіраўніка КДБ, яны могуць казаць што захочуць, гэта «іхныя выдумкі».
belsat.eu
