На бліжэйшыя паўгода прадстаўнікі грамадскага аб’яднання «Таварыства беларускай мовы імя Францішка Скарыны» запланавалі рэалізацыю трох маштабных праектаў, скіраваных на папулярызацыю беларускай мовы.
Паводле старшыні арганізацыі Алега Трусава, адзін з праектаў мае краязнаўчы кірунак, фінансуецца Злучанымі Штатамі ды падтрыманы Міністэрствам культуры. «Гэта вялікі праект у Менску ды рэгіёнах, будзе зладжаны краязнаўчы фестываль і краязнаўчая канферэнцыя», – дадаў ён.
«Другі праект – выданне зборніку Правілаў дарожнага руху (ПДР) па-беларуску. І трэцяе – гэта інтэрнэт-партал. Гэтыя тры вялікія праекты запланаваныя на бліжэйшыя паўгода», – распавёў Алег Трусаў.
Таварыства беларускай мовы імя Ф. Скарыны ўтварылася ў 1989 г. Сябрамі кіроўнага органу – Рэспубліканскай рады ТБМ – у свой час былі прадстаўнікі беларускай эліты, вядучыя навукоўцы, пісьменнікі: Максім Танк, Барыс Сачанка, Фёдар Янкоўскі, Васіль Быкаў, Янка Брыль ды іншыя. Мэта дзейнасці ТБМ – наданне беларускай мове рэальнага дзяржаўнага статусу і абарона правоў беларускамоўнага насельніцтва краіны.
belsat.eu