Адзіны курс: што падаражае ў першую чаргу?


Выхад на адзіны курс для эканомікі ў цэлым – станоўчая з’ява, але гэта азначае і рост коштаў. Эканамісты прагназуюць, што пры самым пазітыўным развіцці падзеяў да канца года яны павысяцца мінімум на 20 %.

Афіцыйны курс выкарыстоўваўся для закупкі газу, электраэнергіі, медыкаментаў ды іншай сацыяльна значнай прадукцыі. Згодна з указам № 366, адпускны кошт на імпартныя лекі вызначаецца, зыходзячы з курсу Нацбанку. Адзіны курс прывядзе да таго, што кошты на лекі «скокнуць» удвая. Пры гэтым ва ўказ № 366 рыхтуюцца змены. Дазволяць пераацэнку лекаў па неабходнасці, а не раз на месяц, як было раней.

Самым бліжэйшым часам варта чакаць падаражання паліва. «Белнафтахім» быў асноўным ініцыятарам выхаду на адзіны курс, бо пры працы з курсам 5750 руб. за долар нафтаперапрацоўка рабілася стратнаю. У выніку некаторыя прадпрыемствы (напрыклад, «Лукойл-Беларусь») пачалі скарачаць колькасць працаўнікоў.

Больш заплацяць беларусы і за паслугі ЖКГ. З пачатку крызісу гэта, бадай, адзіная сфера, дзе амаль не пераацэньваліся кошты ў звязку з новым курсам. Аднак у Міністэрстве жыллёва-камунальнай гаспадаркі паведамілі, што дакументы для павышэння тарыфаў падрыхтаваныя. У свой час віцэ-прэм’ер Анатоль Калінін заявіў: «Аплата камунальных паслугаў падымецца мінімум на сто тысяч рублёў для кожнай кватэры».

Эканаміст Ірына Урбан нагадвае, што падаражэюць імпартныя тавары, мыты на якія дагэтуль выплачваліся паводле курсу 5750 руб.

belsat.eu

Глядзі таксама
Каментары