Лукашэнка больш не падмане Еўрапарламент


Аб гэтым заявіў польскі еўрапарламентарый Кшыштаф Лісек у інтэрв’ю радыёстанцыі Deutsche Welle, каментуючы прынятую напярэдадні ў Страсбургу рэзалюцыю па Беларусі.

“Перш за ўсё дэпутаты Еўрапарламента ў прынятай рэзалюцыі заяўляюць, што дабіваюцца вызвалення праваабаронца Алеся Бяляцкага, а таксама ўсіх палітзняволеных. Мы падкрэсліваем, што больш не дазволім Лукашэнку хлусіць нам, таму што ён выпускае на волю двух-трох актывістаў, але тут жа кратамі аказваюцца іншыя, і так па крузе — бясконца”, — пракаментаваў прыняцце рэзалюцыі Лісек.

“Мы патрабуем не толькі свабоды для ўсіх палітычных вязняў, але і спынення рэпрэсій у дачыненні да дзеячаў апазіцыі, няўрадавых арганізацый і незалежных СМІ. Мы таксама заклікаем да змянення заканадаўства, каб грамадскія арганізацыі і сродкі масавай інфармацыі маглі свабодна ажыццяўляць сваю дзейнасць”, — сказаў ён.

Польскі еўрапарламентарый таксама заклікаў міжнародныя фінансавыя інстытуты не даваць Лукашэнку крэдыты да правядзення ім палітычных рэформ.

“Эканамісты сцвярджаюць, што ў Беларусі развіваецца сур’ёзны крызіс, — зазначыў Лісек. — Рэжым мае патрэбу ў грашах. Таму такія фінансавыя інстытуты, як Еўрапейскі банк рэканструкцыі і развіцця, Міжнародны валютны фонд, Сусветны банк, павінны дакладна і ясна заявіць: калі не будзе палітычных рэформ, калі не будзе сапраўднай дэмакратыі і свабоды слова — Лукашэнка павінен забыць пра крэдыты і іншыя сродкі дапамогі”.

Гэты працэс, на думку Лісека, павінен таксама закрануць заходнееўрапейскія фірмы, што працуюць з Беларуссю. “Настаў час усвядоміць, што яны супрацоўнічаюць з недэмакратычным рэжымам, які не падтрымліваецца Захадам”, — заклікаў ён.

belsat.eu

Глядзі таксама
Каментары