- Выступаючы ў Магілёве на ўстаноўчым сходзе абласнога аддзялення арганізацыі палітык указаў, што бачыць тры варыянты развіцця падзей у краіне: продаж уладамі ўсёй дзяржаўнай уласнасці Расеі, што стане стратаю незалежнасці; спроба распачаць дыялог з Еўрасаюзам; поўная ці частковая самаізаляцыя Беларусі, што таксама прывядзе да залежнасці ад Масквы.
- “Для нас найлепшы варыянт — рэфармаванне эканомікі”, — сцвярджае Мілінкевіч. Што да дыялогу з Захадам, то лідар руху “За Свабоду” ўпэўнены: Еўропа не будзе весці дыялог з беларускімі ўладамі, пакуль не будуць вызваленыя і рэабілітаваныя ўсе палітзняволеныя.
- Паводле Мілінкевіча, апазіцыя павінна стаць у вачах народа суб’ектам палітыкі. “Страчаныя Лукашэнкам людзі пакуль да нас не прыйшлі, — канстатаваў ён. — Мы не сталі для народа альтэрнатываю цяперашняй улады”.
- Змену сітуацыі Аляксандр Мілінкевіч звязвае са стварэннем шырокага аб’яднання апазіцыі. Адной з функцый руху “За Свабоду” ён бачыць у ініцыяванні такога аб’яднання. Пасля ўзначаленая ім арганізацыя, у якую цяпер уваходзяць прыкладна тысяча чалавек па ўсёй Беларусі, паводле меркавання яе лідара, можа стаць ініцыятарам стварэння шырокай правацэнтрысцкай партыі, якая аб’яднае “праеўрапейскія, прабеларускія сілы”.
- Палітык станоўча ацаніў акцыі маўклівага пратэсту, якія арганізуюцца праз сацыяльныя сеткі. Разам з тым ён лічыць, што апазіцыйныя лідары пакуль не павінны нейкім чынам спрабаваць узначаліць гэты рух пратэстаў. “Гэта ўзмацняе нас усіх. Мы дапамагаем сеткам. У нас з імі цесны кантакт”, — заявіў Мілінкевіч.
-
belsat.eu
