Толькі ў Менску падчас акцыі маўклівага пратэсту 3 ліпеня затрыманыя каля 200 чалавек. “У сталіцы было дзве хвалі затрыманняў: першая — падчас парада, калі было затрымана каля 70 чалавек; другая — вечарам каля чыгуначнага вакзала, дзе затрымалі яшчэ прыкладна 100 чалавек”, — паведаміў праваабаронца Валянцін Стэфановіч.
Паводле яго інфармацыі, у Фрунзенскім РУУС Мінска ўжо аформілі каля 50 адміністрацыйных пратаколаў, затрыманых павезлі ў Цэнтр ізаляцыі правапарушальнікаў на Акрэсціна. Усё яны абвінавачваюцца ў дробным хуліганстве (арт. 17.1 КоАП). Суды над затрыманымі павінны прайсці 4 ліпеня.
Калі падчас парада з удзелам вышэйшага кіраўніцтва краіны затрыманні праводзіліся ціха і непрыкметна, то людзей, якія сабраліся ў раёне Прывакзальнай плошчы, разганялі і затрымлівалі з прымяненнем грубай сілы. Людзі ў цывільным накідваліся ў асноўным на моладзь, іх цягнулі па асфальце, заломваючы рукі, некаторых білі. Гэта выклікала негатыўную рэакцыю прахожых, у тым ліку састарэлых людзей. Упершыню супраць удзельнікаў акцыі маўклівага пратэсту прымянілі газ.
Гэта ўжо пятая акцыя маўклівай салідарнасці ў межах кампаніі, ініцыяванай групай “Рэвалюцыя праз сацыяльныя сеткі” праекта “ВКонтакте”. Яе сутнасць у тым, што людзі рэгулярна збіраюцца ў цэнтры сваіх гарадоў. Не скандуючы лозунгаў і заклікаў, яны проста размаўляюць і час ад часу апладзіруюць, выказваючы такім чынам сваю нязгоду з палітыкай кіраўніцтва краіны.
Акрамя Менску акцыі пратэсту ў Дзень Незалежнасці прайшлі ў Берасці, Гомлі, Горадні, Магілёве, Віцесбку ды некаторых іншых гарадах Беларусі. У абласных цэнтрах найбольш шматлікай стала акцыя ў Магілёве, якая сабрала да тысячы чалавек. У рэгіёнах таксама ёсць затрыманні, у тым ліку прэвентыўныя.
belsat.eu
