Аляксандр Лукашэнка: Замест таго каб павучаць – заплаціце


«Перш чым нас павучаць нейкай дэмакратыі, вы, калі ласка, заплаціце нам за тыя ахвяры, якія панёс беларускі народ у імя вызвалення планеты ад карычневай чумы” – заявіў Аляксандр Лукашэнка 1 ліпеня ў Менску на ўрачыстым сходзе з нагоды Дня Незалежнасці. Фрагменты выступлення былі паказаны на беларускіх тэлеканалах.

“Калі ў мяне пытаюць ці гавораць пра гэта, я заўсёды ўспамінаю вашы тыя ліхія 40-я мінулага стагоддзя і патрабую ад любых палітыкаў, якія жывуць за межамі нашай краіны, вядомых краін, з якімі мы былі па розныя бакі барыкад у тыя 40-я ліхія — я патрабую ад іх аднаго: павагі да таго, што зрабілі беларусы, паклаўшы траціну свайго насельніцтва на алтар перамогі ў барацьбе супраць нацызму”, — заявіў Лукашэнка.

“Але сітуацыя не трагічная сёння. Нас не бамбяць, як іншыя краіны, але нас бамбяць іншымі метадамі: санкцыямі і пагрозамі. Асаблівай дапамогі з боку чакаць нам не прыходзіцца. Надзея толькі на саміх сябе. Калі выстаім, Беларусь будзе развівацца і квітнець. Не выстаім — апынемся на палітычных задворках, і з намі ніхто не стане лічыцца”, — сказаў беларускі кіраўнік.

“Як і ў ваенны перыяд, ад нас патрабуецца характар, воля і рашучасць, — заявіў ён. — За сваю незалежнасць нам яшчэ прыйдзецца пазмагацца. Танна, як я ўжо сказаў, яна нікому не даставалася. Паглядзіце, што адбывалася на прасторы разваленага Савецкага Саюза. Новыя дзяржавы нараджаліся з крыві, слёз і грамадзянскіх войнаў. Дзякуй богу, што мы змаглі пабудаваць па-сапраўднаму незалежную Беларусь без вайны”.

“Але і сёння нас атакуюць і выпрабоўваюць на трываласць. Для адных мы ненавісныя тым, што не маршыруем у агульным страі і не скачам пад брусельскую дудку. Для іншых мы нязручны прыклад, які вочы коле. У нас не разрабаваная краіна, няма прорвы паміж абуральнай раскошай адных і абуральнай беднатой другіх”, — лічыць Лукашэнка.

Паводле яго слоў, сяго-таго прыводзіць у шаленства тое, што “ў нас не прадаюцца і не купляюцца дзяржаўныя пасады, мільярды народных грошай не ідуць у афшоры”.

belsat.eu

Глядзі таксама
Каментары