Лідскі замак рамантуюць аўральнымі тэмпамі (відэа)


https://youtu.be/h-kY0Vcf41U
Рэстаўрацыю Лідскага замку, распачатую 34 гады таму, спадзяюцца закончыць перад “Дажынкамі”. Гараджане задаволеныя, што муры нарэшце пачалі аднаўляць, аднак нават неадмыслоўцаў непакоіць якасць будаўнічых працаў.

З 1976 г. рэстаўрацыя то набірала тэмп, то згасала. За гэты час двойчы падала адноўленая сцяна, потым яе адмыслова разбурылі, бо новазбудаваная частка была ў аварыйным стане. Вежу, якую пачалі рэстаўраваць, таксама мусілі часткова разбурыць. Усяго за месяц вырасла новая, якую засталося пакрыць дахоўкаю. Яе, паводле будаўнікоў, прывозяць з Аўстрыі.

Аднак якасць самой рэстаўрацыі можа аказацца значна горшаю за якасць прывазной дахоўкі. Нагадаем, вясною мясцовая раёнка адрапартавала, што ў Лідзе пачаўся рамонт замку. Да таго ж, калі на мурах завіхаліся будаўнікі, архітэктурны праект толькі праходзіў экспертызу…

Паводле інфармацыі Лідскага райвыканкаму, у адной з вежаў замку зробяць музей, у другой – кавярню і краму. Першы этап, які маюць завершыць да “Дажынак”, уключае ў сябе аднаўленне вонкавага выгляду замку. Да сярэдзіны верасня мусяць закончыць паўднёва-заходнюю вежу і заходнюю сцяну, абарончыя галерэі, пракласці інжынерныя сеткі.

Пасля свята будуць займацца падворкам ды інтэр’ерам вежаў. Закончыць рэстаўрацыю замку плануюць у 2012 г.

belsat.eu
03.09.2010
Фота belsat.eu

Глядзі таксама
Каментары