Менскія гарадскія ўлады імкнуцца выправіць сітуацыю на спажывецкім рынку коштам прадпрыемстваў гандлю.
Паводле распараджэння Менгарвыканкаму, прадпрыемствы гандлю мусяць знізіць кошты не менш як на 10 % і забяспечыць поўны асартымент неабходных тавараў. Патрабаванне датычыць раздробнага гандлю ўсіх формаў уласнасці. Зніжэнне цэнаў мае ажыццяўляцца коштам гандлёвай надбаўкі.
«Гандлёвыя надбаўкі на розныя групы тавараў у нас складаюць ад 5 да 15 %. Атрымліваецца, што пры зніжэнні коштаў мы амаль пазбавімся прыбытку, а па некаторых таварах мы ўвогуле сыдзем у мінус», – тлумачыць намесніца дырэктара аднаго са сталічных універсамаў. Безумоўна, гэта адаб’ецца на заробках працаўнікоў гандлю, бо яны залежаць ад прыбытку, атрыманага прадпрыемствам, дадае намесніца дырэктара.
У Менгарвыканкаме падлічылі, што ў выніку зніжэння гандлёвых надбавак для стабілізацыі рынку сталічны гандаль недаатрымае болей за 10 млрд руб. сваіх валавых прыбыткаў. «Гэтая сітуацыя не падлягае эканамічнаму агляду і нагадвае часы ваеннага камунізму», – адзначае эканаміст Міхал Залескі. Паводле эксперта, сталічныя ўлады прынялі абсурднае рашэнне, кіруючыся адною мэтаю –дагадзіць Лукашэнку.
belsat.eu