Міністэрства эканомікі заканадаўча падвышае кошты на мяса. За апошні месяц некаторыя харчы ў Беларусі падаражалі ўдвая. На гэта паўплываў валютны крызіс – асабліва на імпартаваныя прадукты. (гл. табліцу*)
| Пазіцыя | Сакавік 2011 |
Травень 2011 |
| Салодкі перац, кг | 23,2 тыс. руб. | 50 тыс. Руб. |
| Скумбрыя свежамарожаная, кг | 15 тыс. руб. | 35 тыс. руб. |
| Гарбата “Грынфілд”, 100 гр. | 6,4 тыс. руб. | 11 тыс. руб. |
| Кава “Нэскафэ”, 100 гр. | 8 тыс. руб. | 22 тыс. руб. |
| Бананы, кг. | 3,6 тыс. руб. | 7 тыс. руб. |
| Яблыкі, кг. | 6 тыс. руб. | 12,7 тыс. руб. |
*кошты ў сетцы крамаў “Рублёўскі”, Менск.
Падаражалі і беларускія алей, макарона, грэчка, тварог. Дагэтуль кошты на мясныя вырабы былі пад кантролем Міністэрства эканомікі як тавары з катэгорыі сацыяльна неабходных. Спачатку адпусцілі кошты на вараную кілбасу, сёння падпісалі адпаведную пастанову №65. Як растлумачылі ў прэс-службе, згодна з ёй замацоўваецца павелічэнне коштаў на свініну і ялавічыну. “З чэрвеня мяса падаражэе прыкладна на 10 %. У выпадках з найвышэйшаю катэгорыяй мяса пастаўляльнікі самі змогуць усталёўваць цэны ў адпаведнасці з кан’юнктураю рынку”, – адзначылі ў прэсавай службе міністэрства.На меркаванне экспертаў, гэтая навіна будзе спрыяць новай хвалі спажывецкага ажыятажу. “Людзі паспяшаюцца загадзя набыць мяса па старых коштах. Тое самае мы назіралі з крупамі, цукрам, алеем і нават соллю”, – упэўненая эканамістка Ірына Урбан. У Паставах і ваколіцах, напрыклад, за выходныя соль і цукар раскупілі цалкам. Пасля гэтага старшыня мясцовага філіялу “Белбакалеі” прапанаваў увесці ліміт на набыццё прадуктаў. Чыноўнікі райвыканкаму падтрымалі ідэю. “Соль і цукар у крамы завезлі, але цяпер адпускаюць 2 кг солі ды 5 кг цукру ў адныя рукі. Але людзі прыходзяць або цэлымі сем’ямі, або яшчэ раз становяцца ў чаргу, усё адно як у савецкія часы”, – расказвае мясцовы жыхар Павал Грыцкевіч.belsat.eu
