«Гуманітарны канвой» можа вывозіць нарабаванае і целы расейскіх афіцэраў (дапоўнена)
Расейскія КамАЗы са складу «гуманітарнага канвою» пачалі вяртацца ў Расею.
Пра гэта са спасылкай на карэспандэнтаў паведамляе Украінская служба Бі-Бі-Сі.
Афіцыйны прадстаўнік украінскай Рады бяспекі Андрій Лысенка заявіў на брыфінгу для журналістаў, што на цяжкавікі расейцы загружаюць абсталяванне з заводу “Тапаз”, які вырабляе сучасныя радыёлакацыйныя станцыі, ды абсталяванне аднаго з заводаў у Луганску, дзе вырабляюць патроны для стралковай зброі. “Станам на 13 гадзіну ў суботу з тэрыторыі Украіны выехала 184 цяжкавікі, пры гэтым нашых прадстаўнікоў да агляду грузу не дапускаюць“, – заявіў ён.
Некаторыя украінскія медыі са спасылкаю жыхароў гарадоў, занятых тэрарыстамі, сцвярджаюць, што белыя цяжкавікі заязджаюць таксама да моргаў пры шпіталях, дзе нібыта маюць захоўвацца целы забітых расейскіх афіцэраў.
У суботу 23 жніўня пафарбаваныя ў белы колер цяжкавікі прыбылі да ўкраінскага пункту пропуску «Ізварына», што знаходзіцца пад кантролем прарасейскіх сепаратыстаў, а потым пераехалі на расейскі кантрольна-прапускны пункт «Данецк».
Паводле агенцтва «Інтерфакс-Південь», кіраўнік прэс-службы Паўднёвага мытнага ўпраўлення Расеі Раян Фарукшын заявіў, што першыя сем аўтамашынаў «гуманітарнага канвою» Расеі пасля праходжання расейскага мытнага кантролю вярнуліся з Украіны ў РФ.
Паводле яго, мяркуецца, што машыны «гуманітарнага канвою» будуць уваходзіць у пункт пропуску партыямі, а пасля правядзення мытнага дагляду працягнуць рух па тэрыторыі Расейскай Федэрацыі.
«Мы называем гэта прамым уварваннем пад цынічным прыкрыццём Чырвонага Крыжа. Гэта вайсковыя аўтамабілі, гэта вайскоўцы з дакументамі прыкрыцця. Там у ролі кіроўцаў знаходзяцца вайскоўцы, навучаныя на канвойныя функцыі, на кіраванне баявымі машынамі, танкамі і артылерыяй. Транспарт з гэтай калоны будзе ўжыты для перавозкі артылерыі, а значыць, супраць мірнага насельніцтва», – падкрэсліў кіраўнік СБУ Валянцін Налівайчанка.
ЕЗ і НАТО асудзілі гэта ўварванне і заклікалі РФ вывесці свае грузавікі з Украіны.
Паводле паведамлення ўкраінскіх уладаў, калі калона перасякала мяжу, украінскіх мытнікаў заблакавалі на расейскім пункце пропуску. Папярэдне ім удалося агледзець толькі 34 з 262 цяжкавікоў.
Расея заяўляла, што ў пятніцу ва Украіну накіраваліся 280 машынаў «гуманітарнага канвою». Чырвоны Крыж падкрэсліваў, што не ведае, які дакладна груз знаходзіцца ў КамАЗах.
МЯ, belsat.eu, паводле pravda.com.ua
