Больш за мільярд асобаў, згодна са звесткамі Сусветнай турыстычнай арганізацыі, распаўсюджанымі гэтымі днямі, прымералі на сабе летась мянушку «глабальны турыст», наведаўшы тую ці іншую замежную краіну. Самы папулярны кантынент – Еўропа. Яе гасцямі сталі летась каля 560 млн асобаў.
{movie}Найбольш выдаткавалі на турызм кітайцы. А куды падарожнічаюць еўрапейцы? |right|18005{/movie}
А самым наведвальным горадам у Еўропе ўсцяж застаецца Парыж. У Азіі ж золата на гэты раз упэўнена ўзяў Бангкок. Сярод іншых еўрапейскіх гарадоў імкліва расце папулярнасць усходне-еўрапейскіх сталіцаў, найперш – Прагі ды Будапешту. Адмыслоўцы лічаць, што на гэта ёсць, як мінімум, дзве прычыны.
«Усё больш людзей хочуць наведаць Усходнюю Еўропу, бо ў краінах-суседках яны шмат ужо бачылі, бывалі там. Цяпер жа ім свярбіць даследаваць краіны, якія далёка. З тым, каб спазнаць нешта новае. І там яны пакінуць менш грошай», – падкрэсліў Ян Анарт з турыстычнага агенцтва «Jeka» ў Бруселі.
Дарэчы, выдаткі «глабальных турыстаў» склалі летась ні многа, ні мала – $ 140 млрд, прычым кітайцы трацілі больш за ўсіх – каля $ 21 млрд. Адною з папулярных кропак для іх, а таксама для японцаў і для немцаў стала сталіца аб’яднанай Еўропы – Брусель.
Госці Бруселю падкрэсліваюць: «Культура шакаладу тут вельмі цікавая. Культура піва таксама. Архітэктура цудоўная».
Нярэдка апошнім часам можна сустрэць на Гран Пляс у Бруселі і групкі турыстаў з Украіны. Але часам яны прыязджаюць сюды не толькі з місіяй разявакі.
«Дзе размяшчаецца штаб-кватэры НАТО і Еўразвязу? Мы хацелі падыйсці туды і сказаць: калі ласка, дарагія, спыніце вайну ў нас ва Украіне. Скажыце расейцам: “Go home!”», – адзначыла турыстка з Украіны Ганна.
Самым папулярным сродкам транспарту, згодна з Сусветнаю турыстычнаю арганізацыяй, летась усцяж застаўся лятак. Але, каб прывабіць турыстаў, мець прыгожае лётнішча ў краіне недастаткова.
Трэба мець нейкую фішку, а лепш – адразу некалькі. Бельгія, напрыклад, гэта «гняздо» кіроўных органаў Еўразвязу і НАТО, краіна з багатаю культураю піва і шакаладу, радзіма шпіка Эркюля Пуаро і галівудскай зоркі Жана-Клёда Ван Дама, а таксама футбольных «Чырвоных д’яблаў». Самы вядомы каменны хлопчык тут сікае, а турыст масава бяжыць на яго паглядзець. А турыст – гэта інвестар.
Алесь Сіліч, Брусель, belsat.eu