Харчовыя санкцыі Расеі супраць дзяржаваў Еўразвязу, ЗША ды іншых наймацней удараць па суседках РФ, што маюць з ёй наладжаныя гандлёвыя сувязі. У краінах Балтыі шукаюць спосабаў нейтралізаваць наступствы расейскага эмбарга.
{movie}У адказ на эмбарга ў Літве і Латвіі… зніжаюць кошты|right|17905{/movie}
Урад Латвіі вырашыў знізіць падаткі для пацярпелых прадпрыемстваў. На засваенне новых экспартавых рынкаў яны займеюць падтрыманне на 5 млн еўраў. У выніку расейскага эмбарга эканоміка Латвіі можа згубіць каля 55 млн еўраў, палову з гэтай сумы не далічыцца малочная прамысловасць. Нягледзячы на страты, доля харчовага экспарту не такая вялікая, каб зруйнаваць эканоміку краінаў Балтыі. Значна болей згубіць расейскі бок, лічаць эксперты.
У Міністэрстве эканомікі Літвы падлічылі, што адмова Расеі імпартаваць літоўскія харчы запаволіць рост эканомікі на 0,2 %. Каб дапамагчы айчынным вытворцам, дзяржава плануе выкупляць незапатрабаваную прадукцыю, а таксама разважае аб зніжэнні падатку на мясныя прадукты і гародніну.
Увосень Літва ўжо зазнала расейскія малочныя санкцыі, калі “Расспажыўнагляд” прызнаў літоўскую “малочку” неадпаведнаю стандартам. Гэта прымусіла найбуйнейшых вытворцаў шукаць новыя рынкі збыту. Хоць і цяпер малочны сектар краіны падрыхтаваўся згубіць у гэтым месяцы каля 6 млн еўраў прыбытку.
Становішчам транзітнай зоны можа скарыстацца Беларусь. Лукашэнка ўжо адмовіўся падпісвацца пад санкцыямі Пуціна. Паводле адмыслоўцаў, у Беларусі ўжо спрацоўвалі “шэрыя” схемы паставак. Наўрад ці новы шанец зарабіць на чужой вайне будзе ўпушчаны.
Сёння ж прэзідэнт Літвы Даля Грыбаўскайце даручыла прэм’ер-міністру Альгірдасу Буткявічусу ацаніць аб’ём магчымых стратаў у выніку эмбарга Масквы.
З мяжы працягваюць вяртацца грузавікі з прадукцыяй, якую трэба рэалізаваць унутры Літвы. Калі ў Расеі ў выніку санкцыяў кошты на прадукцыю павысіліся, то шараговы жыхар Літвы цяпер можа купіць пакет малака, не рэалізаваны ў Расеі, за зніжаную цану.
Настасся Яўмен, “Белсат”, Вільня