З чым ядуць «раўгеню»? Рэцэпт старой беларускай стравы памятаюць адзінкі


Нацыянальная кухня беларусаў мае шмат забытых і ўнікальных страваў. Рэцэпт салодка-кіслага напою з жытняй мукі – раўгені, вельмі папулярнай у свой ​​час на паўночным захадзе Беларусі, здабыў «Іnterfax.by».

Яшчэ стагоддзе таму гэты напой замяняў нашым продкам квас. Пілі яго і летам, і зімой. Часам на раўгені рабілі закваску для выпечкі хатняга хлеба, але смачней за ўсё, са словаў Маланні Кікіліч з вёскі Антонішкі Астравецкага раёну, захавальніцы забытага рэцэпту, піць раўгеню з варанай або запечанай бульбай.

«І мама мая, і бабуля рабілі раўгеню, яны і мяне навучылі. Я не ведаю, чаму зараз пра яе забыліся. Мабыць, таму што тут патрэбна печ вясковая і дзежка, каб яна выхадзілася. А якая смачная была!», – узгадвае спадарыня Малання.

{movie}Як прыгатаваць раўгеню?|right|17864{/movie}

Рэцэпт жытняга напою з Астравеччыны просты:

Бяруць паўкілаграма жытняй мукі; у яе дадаюць халодную ваду і 3-4 вараныя бульбіны. Бульбу трэба старанна перацерці, каб не было камячкоў. Усё гэта змешваецца і ставіцца ў пратопленую печ парыцца. Паводле спадарыні Меланні, парыцца раўгеня можа цэлы дзень. Затым усе пераліваюць у дзежку, дадаюць вады і чакаюць, пакуль напой закісне. Паводле густу дадаюць цукар ці крыху мёду. Як раўгеня закісне, напой можна піць.

Раўгеню рабілі ў Браслаўскім, Мядзельскім, Пастаўскім, Вілейскім, Астравецкім і іншых раёнах. Гэты напой мае вялікі патэнцыял як мясцовы кулінарны брэнд, бо аднымі дранікамі замежных турыстаў не здзівіш, падае «Іnterfax.by».

Паводле Сяргея Лескеця, interfax.by, фота Сяргея Лескеця, interfax.by

Глядзі таксама
Каментары