На Чэмпіянаце Свету ў Бразіліі надышла пара паўфіналаў. Алесь Баразенка разам з калегамі з іншых СМІ прааналізавалі апошнія матчы прэтэндэнтаў на чэмпіёнства ды падзяліся меркаваннем, каму ўсё ж такі дастанецца запаветны кубак.
Пры аналізе пар паўфіналістаў складваецца ўражанне, арганізатары з самага пачатку планавалі, што менавіта гэтыя каманды патрапяць у 1\\2.
Нямеччына – Бразілія ды Аргентына – Нідэрланды. Нямецкі парадак супраць бразільскага карнавалу. Месізалежная Аргентына супраць Галандыі, з галоўнаю зоркаю не на полі, а на капітанскім мосціку.
Сёння а 23:00 нас чакае першы двубой, паміж гаспадарамі турніру ды камандаю Нямеччыны.
Прагноз Бразілія – Нямеччына
Алесь Баразенка:
Абедзве каманды даволі лёгка прайшлі стадыю адной чацвёртай. Немцы, адкрыўшы лік у матчы з французамі свядома аддалі ініцыятыву ды правялі рэшту матчу абараняючыся. Выйшла ў іх няблага. Такі досвед “цярплівасці” можа ім спатрэбіцца ў матчы з гаспадарамі, якія будуць імкнуцца наперад, гэтага будуць патрабаваць і заўзятары.
Шанцы камандаў ацэньваю як роўныя. За бразільцаў згуляе фактар хатняга чэмпіянату: гэта і родныя сцены з іхнаю неверагоднаю падтрымкаю і больш лаяльнае судзейства. Аднак траўма Нэймара – галоўнай футбольнай зоркі Бразіліі апошніх часоў, ды адсутнасць з-за дыскваліфікацыі Цьяга Сілвы вельмі балюча ўдараць па баяздольнасці каманды Луіса Філіпэ Скалары. Але бразільцаў нездарма называюць “Абранымі” (парт. A Seleção). Гэтая каманда і ў адсутнасць лідараў здольная скарыць любога суперніка.
У немцаў жа цяжка вызначыць кагосьці асабіста. У гэтым і шчасце і бяда гэтай зборнай. З аднаго боку, гэта машына, пераможная хада якой не спыніцца нават калі замяніць адну дэталь на іншую. З іншага боку, няма таго, хто пацягне за сабою гэтую машыну, калі яна раптам забуксуе.
Зьміцер Панкавец, намеснік галоўнага рэдактара газеты “Наша Ніва”:
Немцы і аргенцінцы рана адкрывалі лік у гульнях і дзякуючы большаму чым у супернікаў досведу даводзілі матчы да перамогі. Назваць такі футбол надта прыцягальным ніяк не паварочваецца язык.
Не было феерыі і ў бразільцаў з галандцамі. Бразільцам хоць і дапамагаюць сцены ды арбітры, але гэтая зборная бачыцца без моцных постацяў, без лідараў. Ну дзе дзеліся майстры ўзроўню Рамарыа ці Раналда? Канечне, у бразільцаў быў Неймар, але ён выбыў на паўтара месяца праз пералом хрыбетніка. У такім святле немцы бачацца больш маналітнай камандай, якая зможа вырашыць пастаўленую задачу.
Вольга Шастакова, рэдактар газеты “Ва-банк”:
Заўзею за Нямеччыну. Нам з дзяўчатамі спадабалася знешнасць трэнера Іахіма Лёва. І гэта дзіўнаватая падстава майго заўзятарства дагэтуль аб’ект для жарцікаў і падколак некаторых прасунутых футбольных фанаў кшталту Сашы Баразенкі. Але да таго ж я вывучала нямецкую мову, люблю Берлін. Цяпер ведаю гульцоў, мне пасуе іх інтэрнацыянальнасць – Мюллер са Шванштайгерам, немец турэцкага паходжання Озіл, туніскага паходжання – Хедзіра, напалову ганец Боатэнг (ягоны брат выходзіў на поле супраць Германіі!). Карацей, я сваю каманду абрала і я суб’ектыўна.
Алесь Баразенка, belsat.eu
