{movie}Парад для каго?|right|17192{/movie}
ЖЫХАРЫ МЕНСКУ:
“Для мяне танкі – гэта сімвал вызвалення Беларусі, радзімы. Я ведаю, што гэта не з вайсковымі мэтамі, а проста нагадаць, колькі каштавала ахвяраў, каб было ў нас так, як цяпер ёсць”.
“Трэба ж, каб усё было прыгожа, каб горад не ўпаў тварам у гразь”.
У імя такіх вось эстэтычных і патрыятычных пачуццяў некаторыя менчукі сапраўды гатовыя цярпець і тыя нязручнасці, якія ўзнікаюць у цэнтры сталіцы ў дні рэпетыцыяў параду. Але ж большасці сталічных жыхароў перасоўванне па цэнтры гораду вайсковае тэхнікі не даспадобы. Перадусім з-за перакрыцця дарожнага руху, і як вынік – гіганцкіх коркаў.
ЖЫХАРЫ МЕНСКУ:
“Вельмі кепска, я нават сёння на працу спазнілася на гадзіну і пятнаццаць хвілінаў. Ехала маршруткаю праз Арлоўку, другое кальцо, і быў перакрыты рух”.
“Нязручна. Усе людзі дадому едуць, дзетак з садка забіраць зноў жа”.
“Вось зараз я траплю ў затор і буду адчуваць вельмі негатыўныя эмоцыі”.
З-пад тракаў жа шматтоннай тэхнікі вылятаюць кавалачкі асфальту, на дарозе застаюцца шурпатыя пасы.
ЖЫХАРЫ МЕНСКУ:
“Я перажываю за дарогі, бо якасць дарогі на Сурганава значна горшая становіцца”.
“Вайсковая тэхніка, натуральна, псуе асфальт, а жаўнеры няхай ходзяць, добра”.
Постпарадныя ж рамонты дарогаў некалькі разоў на год у Менску павялічваюць выдаткі і на без таго нятанныя святкаванні.
ЖЫХАРЫ МЕНСКУ:
“Я супраць, супраць растраты грошай на такія імпрэзы, я лічу, што сацыяльныя праграмы патрабуюць большага фінансавання. На маю думку, для Беларусі гэта празмерная раскоша”.
“Панты каштуюць грошай, усім зразумела. Хоць і такія”.
Падчас учорашняй рэпетыцыі не абышлося і без форс-мажораў. Карыстальнікі сацыяльных сетак паведамілі пра ўзгаранне танка, не даехаў да месца прызначэння і адзін з ракетных комплексаў.
Менчукі ж чарговы раз мусяць рыхтавацца да нязручнасцяў – наступная рэпетыцыя параду запланаваная ўжо на суботу. Перакрываць рух пачнуць практычна ў гадзіну пік, з 16:30.
Алесь Яшчанка, “Аб’ектыў”