Яшчэ 28 жыхароў Данецку пераехалі ў Беларусь. Ад тых, хто просіць статус уцекача, гэтыя людзі адрозніваюцца тым, што разам з сабою яны забралі ў Менск сваю працу. Тое, што з Данецку час з’язджаць, кіраўнік буйнога рэкламнага агенцтва вырашыў яшчэ на пачатку ўзброенага неспакою.
{movie} Міграцыя ITшнікаў|right|17103{/movie}
АРЦЁМ ГЕРАШЧАНКА, ДЫРЭКТАР РЭКЛАМНАГА АГЕНЦТВА «GEKOS»:
“У мяне была дакладная інфармацыя, што яшчэ ў красавіку на руках было 12 000 адзінак незарэгістраванай зброі. Мы разумелі, што набліжаецца махноўшчына”.
Кампанія, якая гандлюе рэкламаю ў інтэрнэце, не моцна залежыць ад месцазнаходжання, таму кірунак для пераезду выбіралі згодна з падобнымі эканамічнымі стандартамі ды адкрытасцю рынку.
Фірма, якая складалася з 80 чалавек, скарацілася напалову. Апроч Беларусі, офіс кампаніі адкрыўся таксама ў Балгарыі. Аднак ёсць і тыя, хто застаўся працаваць на трывожным украінскім усходзе. Меркаванні пра сітуацыю там у кампаніі падзяліліся, галоўную ж праблему сёння ўсе акрэсліваюць аднолькава.
ГАННА ВЕШНЯКОВА, МЕНЕДЖАР ПА ПРОДАЖАХ:
“Анархія, і няма ўлады як такой. Кожны можа назваць сябе ўладаю. Вось народны мэр. Я прыйду і скажу – я хачу. Гэта дзіўна. Гэтым карыстаюцца тыя, хто насамрэч нікога не падтрымлівае – толькі сябе. Яны надзелі маску, кімсьці сябе назвалі, і пачынаюцца марадзёрствы, спыняюць на вуліцы”.
Паводле працаўнікоў агенцтва, адначасова з імі ў Беларусь пераязджаюць яшчэ дзве IT-кампаніі. Агулам колькасць мігрантаў з Данеччыны і Луганшчыны ў Беларусь з пачатку года вырасла на траціну. 65 чалавек ужо папрасілі статусу ўцекача, каля 700 зарэгістраваліся для таго, каб працаваць, каля 400 – папрасілі від на сталае жыхарства.
АЛЯКСЕЙ БЯГУН, МІНІСТЭРСТВА ЎНУТРАНЫХ СПРАВАЎ:
“Калі раней асноўны паток мігрантаў быў з Афганістану, летась – з Сірыі, то сёлета дамінуе Украіна”.
Героям нашага матэрыялу пакуль у Менску падабаецца. Іх цешыць колькасць вольных нішаў на рынку IT ды таннейшага, чым у Данецку, жытла ў навабудах. А таксама – міралюбнасць беларускага народу.
АРЦЁМ ГЕРАШЧАНКА, ДЫРЭКТАР РЭКЛАМНАГА АГЕНЦТВА «GEKOS»:
“Ён практычна заўсёды апалітычны, яму важна быць у цяпле ды бяспецы, і, па вялікім рахунку, шмат каму ўсё роўна, хто будзе пры ўладзе – Лукашэнка, Парашэнка, Пуцін”.
Украінскія рэкламнікі не выключаюць, што нехта з іх пажадае і асесці ў цёплым бяспечным Менску. Але большасць усё ж спадзяюцца вярнуцца дадому – калі ў Данецк прыйдзе мір ды адносная пэўнасць.
Адэля Дубавец, “Аб’ектыў”, belsat.eu
